नेकपा माओवादी केन्द्र कोशी प्रदेश संसदीय दलका नेता इन्द्रबहादुर आङ्बोले मुख्यमन्त्री केदार कार्कीको नियतमा खोट देखेपछि आफूहरुले संकल्प प्रस्ताव ल्याउनु परेको दाबी गरेका छन् ।
शुक्रबार बसेको प्रदेश सभाको बैठकमा बोल्दै पूर्व मन्त्रीसमेत रहेका आङ्बोले अल्पमतमा परेका मुख्यमन्त्री केदार कार्कीले वैशाख २५ गतेसम्म प्रदेश सभाबाट विश्वासको मत लिनुपर्ने र नभए राजीनामा दिनुपर्ने बताए । उनले मुख्यमन्त्री कार्कीले विश्वासको मत पनि लिदिँन र राजीनामा पनि दिन्न भनेकाले नै संकल्प प्रस्ताव ल्याउनु परेको बताएका हुन् ।
संविधानको धारा १६८ को उपधारा ५ अनुसार बनेको सरकारले पनि दलले समर्थन फिर्ता लिएमा विश्वासको मत लिनैपर्ने व्यवस्था रहेको स्मरण गराउँदै आङ्बोले मुख्यमन्त्री कार्कीले ३० दिनभित्र विश्वासको मत लिनैपर्ने जिकिर गरे । उनले मुख्यमन्त्री कार्कीले भनेजस्तो प्रदेश सभा विघटन हुने कुनै पनि सम्भावना नरहेको दाबी गरे ।
उनले भने- ‘संवैधानिक इजलासले धारा १६८ ९५० अन्तर्गत सरकारलाई दिएको समर्थन व्यक्ती या दलले समेत फिर्ता लिन पाउने व्याख्या गएकाले आफूहरूले समर्थन लिएको बताए । उनले प्रश्न गर्ने सरकार कहाँबाट जन्मिन्छ ? सरकार त संसदबाट जन्मिने होइन ? संसदले सरकार जन्मिन्छ भने सांसदले निर्देश गरेपछि मुख्यमन्त्रीले निर्धारित समय भित्र मार्ग प्रशस्त गर्नु पर्छ ।
‘सरकार संसदले बनाउने हो । संसद्मा रहेका एक चौथाई सदस्यले संसद बोलाउन पाउँछ । यो संसदले पारित गरेको संकल्प प्रस्ताव कानून सरह लागू हुन्छ । संकल्प प्रस्तावमा भएको विषय सरकारले स्वीकार गर्नुपर्छ’ उनले भने । ‘संसदीय व्यवस्थालाई अंगिकार गर्ने प्रमुख दल नेपाली कांग्रेसले यसलाई स्वीकार गर्छ भन्नेमा हामी विश्वस्त छौं’ ।
बिहीबार सुरु भएको बैठकमा नेकपा एमाले प्रदेश संसदीय दलका प्रमुख सचेतक रेवतिरमण भण्डारी प्रस्तावक र एमालेकै किशोरचन्द्र दुलाल तथा माओवादीका गणेश उप्रेती समर्थक रहेर संकल्प प्रस्ताव पेश भएको थियो ।