सेयर बजारमा दोहोरो अंकको गिरावट

सेयर बजारमा दोहोरो अंकको गिरावट आएको छ । बजार १५.८२ अंकको गिरावट आउँदा परिसूचक २२२३.७८ बिन्दुमा रोकिएको छ । बिहीबारको तुलनामा शुक्रबार कारोबार रकम भने वृद्धि भएको छ । यस दिन कुल २२३ कम्पनीको २१ हजार ९०४ कारोबारबाट ४१ लाख ४० हजार ६६५ कित्ता सेयर किनबेच भएको छ ।
कारोबारमा अधिकांश समूहको उपसूचकमा गिरावट आएको छ ।

बैंकिङ समूहको उपसूचक ६.०८, विकास बैंक ३७.५४, फाइनान्स कम्पनी २२.३६, जलविद्युत २९.७३, जीवन बीमा ७८.८१, माइक्रोफाइनान्स ३७.८१, निर्जीबन बीमा समूहको उपसूचक ६८.४६ अंकले घटेको छ ।

शुक्रबार रुरु जलविद्युतको सेयर मूल्य सबैभन्दा धेरै ६.१३ प्रतिशतले बढेर ९ सय रुपैयाँ पुगेको छ । कारोबारमा रुरु जलविद्युत परियोजना, नारायणी विकास बैंक, उपकार लघुवित्त वित्तीय संस्था, यूनाइटेड आईडीआई मार्दी आरबी हाईड्रोपावर कम्पनीका लगानीकर्ताले कमाएका छन् ।

यस्तैहिमाल दोलखा हाइड्रो, कर्णाली विकास बैंक माथिल्लो तामाकोशीसहितका कम्पनीको मूल्य सबैभन्दा धेरै घटेको छ ।

कारोबारमा प्रभु बैंकको संस्थापक सेयर धेरै मूल्यमा कारोबार भएको छ । १७ करोड ६० लाख ७५ हजार रुपैयाँको बैंकको संस्थापक सेयर किनबेच भएको छ । धेरै कारोबार हुने कम्पनीमा मेगा बैंक पनि रहेको छ । बैंकको ९ करोड ८२ लाख ४० हजार रुपैयाँको सेयर किनबेच भएको छ ।

आजदेखि दोस्रो बजारमा कारोबार संचालनका लागि सूचीकृत भएको लघुवित्तको सेयर मूल्य पहिलो कारोबार दिन ४.०४ प्रतिशत बढेको छ। शुक्रबारको कारोबारपछि उपकार लघुवित्तको अन्तिम कारोबार मूल्य १२५९.९० रुपैयाँ पुगेको छ।