चैत मसान्तभित्र सबै नागरिकले खोप पाउने गरी व्यवस्थापन गर्न प्रधानमन्त्रीको निर्देशन

प्रधानमन्त्री शेरबहादुर देउवाले कोरोनाविरुद्धको खोपमा कुनै कमी हुन नदिन निर्देशन दिएका छन् ।

बिहीबार प्रधानमन्त्रीको सराकारी निवास बालुवाटारमा बसेको कोभिड–१९ संकट व्यवस्थापन समन्वय केन्द्रको पहिलो बैठकमा प्रधानमन्त्री देउवाले खोप लगाउन योग्य सबै नागरिकलाई खोप दिने प्रबन्ध गर्न निर्देशन दिएको प्रधानमन्त्री कार्यालयका सचिव महेश्वर न्यौपानेले जानकारी दिए ।

आगामी चैत मसान्तसम्म सबै नेपाली नागरिकलाई कोरोनाविरुद्धको खोप लगाइसक्ने सरकारी लक्ष्य रहेकाले सरकारको लक्ष्यमा केन्द्रित हुन निर्देशन दिएको बैठकपछि सचिव न्यौपानेले जानकारी दिए ।

त्यस्तै बैठकमा प्रधानमन्त्री देउवाले सबै नागरिकलाई निःशुल्क खोप लगाउने व्यवस्था गर्नका लागि दाताहरुसँग आग्रह गरेर वा आफै खरिद गरेर भएपनि खोपमा कुनै कमी हुन नदिन समन्वय केन्द्र, स्वास्थ्य मन्त्रालय र सम्बन्धित सबै निकायलाई खोपको सुनिश्चितताका लागि निर्देशन दिनुभएको उनले बताए ।

बैठकमा हालसम्म कुल जनसंख्याको ३४ प्रतिशतले कोभिडविरुद्ध खोपको पहिलो मात्रा पाएका छन् भने २२ प्रतिशतले दुवै मात्रा खोप लगाएको स्वास्थ्य मन्त्रालयले जानकारी दिएको सचिव न्यौपानेले बताए । तत्कालीन केपी ओली नेतृत्वको सरकारले अध्यादेशमार्फत कोभिड–१९ संकट व्यवस्थापन केन्द्र (सीसीएमसी) गठन गरेको थियो । तर, सो अध्यादेश निष्क्रिय भएपछि देउवा सरकारले आदेशमार्फत् प्रधानमन्त्रीको संयोजकत्वमा कोभिड–१९ संकट व्यवस्थापन समन्वय केन्द्र गठन गरेको थियो । केन्द्रको पहिलो बैठकले केन्द्रको जनशक्ति व्यवस्थापन र संगठन संरचनासम्बन्धी प्रस्ताव स्वीकृत गरेको छ ।

Loading...