उत्तरपुस्तिका हराएको विषयमा छानबिन गर्न त्रिविले बनायो उच्चस्तरीय समिति 

काठमाडौं – त्रिभुवन विश्वविद्यालयले स्नातक तह प्रथम वर्षको मानविकी तथा सामाजिक शास्त्र सङ्कायका दुई विषयका उत्तर पुस्तिका हराएपछि छानबिन गर्न उच्चस्तरीय समिति गठन गरेको छ।

त्रिवि कार्यकारी परिषद्को बिहीबारको बैठकले उत्तर पुस्तिका हराएको विषयमा विस्तृत छानबिन गर्न समिति गठन गर्ने निर्णय गरेको हो। पूर्व रजिस्ट्रार प्रा.डा. चन्द्रमणि पौडेलको नेतृत्वमा तीन सदस्यीय उच्चस्तरीय समिति गठन गरिएको त्रिवि रजिस्ट्रारको कार्यालयले विज्ञप्ति मार्फत जनाएको छ ।

विद्यार्थीका उत्तर पुस्तिका हराएको विषयमा विभिन्न सञ्चार माध्यमहरूमा खबर प्रकाशित भएपछि त्रिविले छानबिन समिति गठन गरेको हो ।

गत वैशाखमा भएको स्नातक तह प्रथम वर्षको मानविकी तथा सामाजिक शास्त्र सङ्कायअन्तर्गत जनसङ्ख्या तथा स्वास्थ्य विषय (कोड नं. ४२२ ) र शिक्षा शास्त्र सङ्काय तर्फको शिक्षाको आधार विषय ( कोड नं. ४१२ ) का उत्तरपुस्तिकाहरू हराएको थियो। उत्तर पुस्तिका हराएका दुई विषयको परीक्षा यही चैत २१ गते गर्ने त्रिविले तयारी गरेको छ।

उत्तर पुस्तिका हराएको घटना के कसरी भएको हो भन्ने विस्तृत छानबिन गरी ३० दिन भित्र प्रतिवेदन पेस गर्नेछ ।