बाँकी जीवन देश र जनताको पक्षमा समर्पित गर्छु : प्रचण्ड
प्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफू नेतृत्वको सरकारले जनपक्षीय कामहरू गरिरहेको बताएका छन् ।
पार्टी केन्द्रीय कार्यालय पेरिसडाँडा कोटेश्वरमा आज ‘जनतासँग माओवादी विशेष रूपान्तरण अभियान’को उद्घाटन गर्दै उनले वर्तमान सरकारले इतिहास नै सम्झिने गरी साहसिक र जनपक्षीय काम गरिरहेको दाबी गरे ।
अध्यक्ष प्रचण्डले देशका ६ हजार ७४३ वडामा भर्चुअल माध्यममार्फत एकसाथ ब्यानर खोलेर अभियानको उद्घाटन गरे ।
सो क्रममा उनले सरकारले सामाजिक न्यायको प्रत्याभूति, सुशासन, सार्वजनिक सेवा प्रवाहमा जनताको सहज पहुँच र विकासलाई मुख्य प्राथमिकता दिँदै काम गरिरहेको उल्लेख गरे ।
सरकारले नक्कली शरणार्थी प्रकरण, ललिता निवास प्रकरण, सुन काण्डमा निष्पक्ष पूर्वक गरिएको कामले सरकारको प्रशंसा भएको प्रचण्डको जिकिर थियो ।
प्रधानमन्त्री प्रचण्डले राजनीतिक र सामाजिक अराजकताको स्थानमा सकारात्मक भाष्यको निर्माण हुँदै सरकार र प्रणालीप्रतिको विश्वास क्रमशः बढ्दै गएको बताए ।
उनले आफैँले गरेका राम्रा काम पनि जनतासम्म पुर्याउन नसकेको गुनासो गर्दै यो अभियानले सरकारका तर्फबाट भइरहेका जनपक्षीय कामहरूलाई समेत जनतामा सम्प्रेषण गर्दै सरकार र जनताबीच सम्बन्ध बिस्तार गर्ने विश्वास व्यक्त गरे ।
अध्यक्ष प्रचण्डले हिजो विद्रोहको नेतृत्व गरेको स्मरण गर्दै अहिले शान्तिको नेतृत्व पनि आफूले गर्ने जिकिर गर्दै बाँकी जीवन देश र जनताको पक्षमा समर्पित गर्ने उद्घोष गरे ।
उनले जनतासँग गल्ती कमजोरीमा आत्मालोचित हुन नेता तथा कार्यकर्तालाई निर्देशन समेत दिए । उनले भने, ‘जनतासँग हामीले गल्ती भएको कुरा भन्न सक्नुपर्छ । हाम्रो कमजोरीप्रति आत्मालोचित हुन चाहन्छौँ र सुध्रिन चाहन्छौँ भन्नुपर्छ ।
