सिसिएमसी बैठक : स्मार्ट लकडाउनको अवधारणा तयार

कोभिड–१९ सङ्कट व्यवस्थापन केन्द्र (सिसिएमसी) को बैठकमा कोभिड महामारी नियन्त्रणका लागि कसरी संयन्त्रलाई चुस्त र प्रभावकारी ढङ्गले परिचालन गर्ने भन्ने विषयमा छलफल भएको छ ।

प्रधानमन्त्री तथा मन्त्रिपरिषद् कार्यालय सिंहदरबारमा आज बसेको सिसिएमसीको बैठकमा महामारीको पछिल्लो अवस्था र आगामी रणनीतिबारे छफफल भएको बुझिएको छ ।

प्रधानमन्त्री शेरबहादुर देउवाको उपस्थितिमा बसेको सो बैठकमा गृहमन्त्री बालकृष्ण खाँण, अर्थमन्त्री जनार्दन शर्मा, कानून, न्याय तथा संसदीय मामिलामन्त्री ज्ञानेन्द्रबहादुर कार्की, ऊर्जा, जलस्रोत तथा सिँचाइमन्त्री पम्फा भुसाल, प्रधानसेनापति, सिसिएमसीका प्रमुख बालानन्द शर्मा र विभिन्न मन्त्रालयका सचिवको सहभागिता थियो ।

नेपालमा पछिल्ला दिनमा कोरोना भाइरस सङ्क्रमितको सङ्ख्या बढिरहेको छ । बढ्दो महामारी नियन्त्रण गरी जनजीवनलाई सामान्य तुल्याउने सन्दर्भमा बैठकमा छलफल भएको सिसिएमसीका एक अधिकारीले जानकारी दिए ।
सीसीएमसीले स्मार्ट लकडाउनको अवधारणा तयार पारेको छ । केन्द्रले तयार पारेको स्मार्ट लकडाउनको अवधारणा बैठकमा पेश गरिएको हो। कारोना संक्रमणको दर, मृत्यु दर, अस्पतालमा पूर्वाधारको अवस्थालगायतका सूचकका आधारमा जोखिमलाई चार वटा क्षेत्रमा वर्गीकरण गर्न प्रस्ताव गरिएको बताइएको छ । त्यसका आधारमा सम्बन्धित जिल्लाले स्मार्ट लकडाउन गर्न सक्ने व्यवस्था हुने बुझिएको छ ।

स्वस्थ्य मन्त्रालयले संक्रमण दर बढ्दै गएपछि स्मार्ट लकडाउनको प्रस्ताव पेश गरेको हो । स्वास्थ्य तथा जनसङ्ख्या मन्त्रालयका अनुसार आज एकै दिन तीन हजार ६११ जना सङ्क्रमित थपिएका छन् भने २७ जना सङ्क्रमितको मृत्यु भएको छ ।

Loading...