गण्डकीमा मुख्यमन्त्रीले विश्वासको मत पाएको सभामुखद्वारा घोषणा, सभामा होहल्ला

गण्डकी प्रदेशका सभामुख कृष्णप्रसाद धितालले मुख्यमन्त्री खगराज अधिकारीको पक्षमा उभिएका ३० सांसद उभिएपछि विश्वासको मत पाएको घोषणा गरिदिएका छन् ।

प्रदेशसभामा मुख्यमन्त्री अधिकारीले मागेको विश्वासको मतको पक्षमा ३०, विपक्षमा २७ र २ जना सांसद तटस्थ बसेको उनले घोषणा गरे ।

मुख्यमन्त्रीलाई एमालेका २२, माओवादी केन्द्रका ७ जना र स्वतन्त्र सांसद राजीव गुरुङले विश्वासको मत दिएका थिए भने प्रमुख प्रतिपक्षी नेपाली कांग्रेसका २७ जना सांसद विपक्षमा उभिएका थिए ।

दुईजना सांसद रहेको राष्ट्रिय प्रजातन्त्र पार्टी भने तटस्थ रह्यो । माओवादी केन्द्रबाट चुनाव जितेका सभामुख भने निर्वाचन प्रक्रियामा सहभागी भएनन् तर उनले सर्वोच्च अदालतले यही वैशाख १७ गते गरेको फैसलामा टेकेर खगराजले ६० सदस्यीय संसदमा ३० जनाबाटै बहुमत सिद्ध गरेको घोषणा गरे ।

सर्वोच्चको वैशाख १७ गतेको फैसलामा ‘गण्डकी प्रदेशको जम्मा प्रदेशसभा सदस्य ६० जना रहेको र प्रत्यर्थी माननीय खगराज अधिकारीको दाबीमा नेकपा (माओवादी केन्द्र) को सदस्य संख्यामा सभामुखलाई गणना नगर्दा पनि प्रदेशसभा सदस्य ५९ जनामा ३० जनाको संख्या पुगेको देखिन्छ’ भन्ने व्याख्या रहेको छ ।

सभामुखको यही कदमलाई लिएर प्रमुख प्रतिपक्षी दल नेपाली कांग्रेसले नाराबाजी गरेको छ । कांग्रेस संसदीय दलका नेता सुरेन्द्रराज पाण्डेले मुख्यमन्त्री अधिकारीले राखेको विश्वासको मतमाथिको प्रस्तावमा बोल्दै यही असंवैधानिक काम केहीबेरमा हुनसक्ने बताएका थिए ।