सुदूरपश्चिम प्रदेशका मन्त्री सोडारीकी पत्नीविरुद्ध भ्रष्टाचार मुद्दा

धनगढी– अख्तियार दुरुपयोग अनुसन्धान आयोगले सुदूरपश्चिम प्रदेश सरकारका भौतिक पूर्वाधारमन्त्री दीर्घबहादुर सोडारीकी पत्नीविरुद्ध भ्रष्टाचार मुद्दा दायर गरेको छ।

मन्त्री सोडारीकी पत्नी गीता सोडारीविरुद्ध अख्तियार आयोगले भ्रष्टाचार मुद्दा दायर गरेको आयोगका प्रवक्ता श्यामप्रसाद भण्डारीले शुक्रबार जानकारी दिए।

नक्कली शैक्षिक प्रमाणपत्र पेश गरी शिक्षकको जागिर खाएको अभियोगमा आयोगले शुक्रबार गीताविरुद्ध विशेष अदालतमा मुद्दा दायर गरेको हो।

कैलालीको धनगढी उपमहानगरपालिका(९ स्थित शिव माविमा गीताले राहत शिक्षकका रुपमा काम गरेकी थिइन्। भारत नयाँ दिल्लीको बोर्ड अफ सेकेन्डरी एजुकेशनबाट १० कक्षा उत्तीर्ण गरेको नक्कली शैक्षिक प्रमाणपत्र पेश गरी गीताले शिक्षकको नियुक्ति लिएको पुष्टि भएपछि आयोगले उनीविरुद्ध मुद्दा दायर गरेको हो।