कांग्रेसले अहंकार देखाउन थाल्यो : माधव नेपाल
नेकपा एकीकृत समाजवादीका अध्यक्ष माधवकुमार नेपालले स्थानीय तहमा पहिलो दल बनेपछि कांग्रेसले अहंकार देखाउन थालेको बताएका छन् ।
शनिबार काठमाडौंमा नेपाल तामाङ संघ समाजवादीको राष्ट्रिय भेलालाई सम्बोधन गर्दै नेपालले आफ्नो पार्टीको मद्धतले नै स्थानीय निर्वाचनमा कांग्रेस पहिलो दल भएको भन्दै पहिलो पार्टी बनेपछि कांग्रेसले अहंकार देखाउन थालेको बताएका हुन् ।
उनले अहिले कांग्रेसले नै आफ्नो पार्टीलाई प्रयोग गरेर आफैलाई बुर्कुसी मार्ने हो कि भन्ने डर पैदा भएको समेत बताए । उनले दुईतिहाइको फुर्ती देखाएकालाई सडकमा फालेर इतिहासमा नै नयाँ किर्तिमान बनाएको जिकिर गरेका छन् ।
अध्यक्ष नेपालले गठबन्धनको डम्फु नबजाई पार्टीलाई सुदृढ बनाउने स्पष्ट पारे । त्यस्तै उनले कम्युनिष्ट पार्टी दुईतिहाईमा पुगेपनि त्यसको सहि उपयोग गर्न नसकेको उल्लेख गरेका छन् ।
नेपालले केहि व्यक्तिमा अहंकार बढेको र निरंकुश प्रबृति हावी भएका कारण नै कम्युनिष्ट पार्टी बिभाजित भएको तर्क गरे ।
