बजेट सन्तुलित र वास्तविक छ, महत्त्वाकाङ्क्षी छैन : अर्थमन्त्री शर्मा

अर्थमन्त्री जनार्दन शर्माले आउँदो आर्थिक वर्षका लागि प्रस्तुत गरेको बजेट अत्यन्तै संयमता अपनाएर स्रोत र साधनको उचित विनियोजन गरिएको बताएका छन् ।

प्रतिनिधि सभाको आज शुक्रवारको बैठकमा आव २०७९–८० को बजेटमाथिको सैद्धान्तिक छफलमा उठेका प्रश्नको उत्तर दिँदै उनले बजेट महत्त्वाकाङ्क्षी नभइ सन्तुलित र वास्तविक भएको उल्लेख गरे ।

अर्थमन्त्री शर्माले चालु आवको तुलनामा आउँदो वर्षको बजेट ९ दशमलव ८६ प्रतिशतले मात्रै बढी भएकाले यसलाई महत्त्वाकाङ्क्षी भन्न नमिल्ने बताए । उनले संविधान र सङ्घीयताको मर्मलाई मध्यनजर गरी बजेट तर्जुमा गरिएको धारणा राखे ।

कृषि क्षेत्रमा प्रोत्साहन, बाँझो जमिनको सदुपयोग र युवालाई कृषिमा आकर्षण गर्न कार्यक्रम बजेटमा समेटेको उनले जानकारी दिए। किसानलाई आत्मसम्मानका साथ उत्साहित गर्नुपर्ने भएकाले योगदानमा आधारित किसान हितकोषको व्यवस्था गरिएको र बजेटले आन्तरिक उत्पादनलाई जोड दिएको उनले उल्लेख गरे ।

उपलब्ध स्रोत, साधन, पुँजी र प्रविधिलाई जोडेर तीव्र उत्पादनतर्फ देशलाई लैजाने आजको आवश्यकता भएकाले त्यहीअनुसार बजेट तर्जुमा गरिएको मन्त्री शर्माले बताए । उत्पादनमूलक उद्योग, निर्यात प्रवर्द्धनलगायत विषयलाई बजेटले समेटेको पनि उनले जानकारी दिए।

अर्थमन्त्री शर्माले चुनाव हुने वर्ष भए नि संविधानतः सरकारले हरेक जेठ १५ मा वार्षिक बजेट पेस गर्नुपर्ने भएकाले त्यो दायित्व निर्वाह गर्दै बजेट ल्याइएकाले चुनावपछि बन्ने सरकारले पनि यस बजेटलाई निरन्तरता दिने विश्वास व्यक्त गरे। उनले देशको अर्थतन्त्र चलायमान बन्दै गएको र पर्यटनबाहेक सबै क्षेत्र पूर्ववतः अवस्थामा फर्किएको तथा राजस्व सङ्कलन पनि सन्तोषजनक रहेको बताए ।