पदमुक्त भएपछि शेरचनले भने – अधिकारविहीन खुला जेलबाट मुक्त हुन पाउँदा खुसी छु

नेपालको राजनीति निरंकुशतातिर धकेलिएको शेरचनको आरोप

Sunrise Bank Middle Size

सोमबारमात्रै गण्डकी प्रदेश प्रमुखबाट पदमुक्त भएका अमिक शेरचनले पदमुक्त भएकोमा खुशी लागेको बताएका छन् । मंगलबार बिहान पोखरामा पत्रकार सम्मेलन गर्दै उनले भने, ‘पदमुक्त भएकोमा अत्यन्त खुसी छ । मुरी–मुरी धन्यवाद छ राष्ट्रपतिज्यूलाई ।’

उनले आफू पदका लागी राजनिति नगरेको भन्दै अधिकारविहीन खुला जेलबाट मुक्त भएको बताएका छन् । उनले पार्टीको निर्णयले आफू प्रदेश प्रमुख बनेको भन्दै अगाडी भने “पहिला ओली जी र प्रचण्ड जी मार्फत प्रस्ताव आउँदा ओलीजीको प्रस्ताव मैले अस्वीकार गरेको थिएँ, पछि पार्टीले निर्णय सुनाएपछि अनुशाशित कार्यकर्ताको नाताले बाध्य भै स्वीकार गरेको पद हो त्यो । अधिकारविहीन खुला जेलबाट पदमुक्त गरिदिनुभएकोमा पुनः धन्यवाद दिन चाहन्छु राष्ट्रपतिज्यूलाई ।’

शेरचनले नेपालको राजनीति निरंकुशतातिर धकेलिएको समेत बताएका छन् । उनले आफूलाई जानकारीबिनै हटाइएको र यसबाट मिडियामार्फत थाहा पाएको जनाए । ‘पहिल्यै भनेको भए मैले राजीनामा दिन्थेँ, म नमान्दा–नमान्दै थामिएको पद थियो । रहरले भन्दा पनि बाध्यताले आएको थिएँ । संसद् विघटन हुने बेला नै राजीनामा दिने तयारी गरेँ । प्रचण्डले रोकेका कारण दिएको थिइनँ । अहिले आफैं हटाइयो ।’

उनले राजनीतिमा ६२ वर्ष बिताएको जनाउँदै आफूलाई कुनै पनि पदको लोभ नभएको बताए । अबका दिनमा खुला राजनीतिमा सक्रिय रहने भन्दै उनले आफूले पदीय मान्यता विपरीत कार्य नगरेको दाबी समेत गरेका छन् ।

सरकारले माओवादी केन्द्रका नेता शेरचनलाई गण्डकी प्रदेशको प्रमुखबाट सोमबार हटाएको थियो । सो पदमा एमाले नेता सीता पौडेललाई नियुक्त गरिएको छ ।

Prabhu Bank Middle Size
Kumari Bank Middle Size
Loading...