ज्ञापनपत्र बुझ्दै नेपालले भने- सरकारले मन्त्री नपाए हामी दिन्छौँ, पेट्रोलियम पदार्थको मूल्य घट्नुपर्यो
नेकपा (एकीकृत समाजवादी)का अध्यक्ष माधवकुमार नेपालले वर्तमान सरकारलाई उद्योग वाणिज्य तथा आपूर्ति मन्त्री आवश्यक परेको खण्डमा आफ्नो पार्टीले दिन तयार रहेको बताएका छन् ।
आइतबार विद्यार्थी संगठनहरुले पेट्रोलियम पदार्थको कर घटाइ मूल्यवृद्धि फिर्ता लिन माग गर्दै बुझाएको ज्ञापन पत्र बुझ्दै अध्यक्ष नेपालले पेट्रोलियम पदार्थको मूल्यवृद्धिमाा सरकार गम्भिर बन्नुपर्ने र आपूर्ति मन्त्री नहुँदा समस्या भएको बताएका हुन् ।
‘समस्याको कारण पनि खोज्नु पर्यो समाधान पनि निकाल्नु पर्यो । यसको निमित्त सबैभन्दा पहिले सत्तामा बसेको पक्ष अर्थात् सरकार गम्भीर बन्नुपर्यो । एउटा समस्या भनेको मन्त्रीको जिम्मेवारी नदिएर पनि बिग्रिएको छ । मन्त्री भइदियो भने हुन्छ । प्रधानमन्त्री आफैँले सबै कुराहरुलाई राम्रोसँग बुझ्न, समय दिन सक्दैनन् । त्यसको निम्ति हामीले भनिरहेका छौँ, अरु कोही नपाइए हामी छँदै छौँ नि मन्त्री दिने भनिरहेका छौँ । सुन्दैनन् ।’ नेता नेपालले भने ।
अध्यक्ष नेपालले रक्सौलमा पेट्रोलियम पदार्थ आउने पाइपलाइन जोडिसकेपछि पनि तेलको मूल्य बढिरहेकोमा अचम्म लागेको बताएका छन् । ‘रक्सौलबाट पाइपलाइन जोडिसकेपछि सस्तो हुनु पर्ने हो, मैले पनि बुजिरहेको छैन, किन महंगो भइरहेको छ, हिजो कति खर्च हुने गर्दथ्यो ?’ उनले भने, ‘त्यसमा ढुवानी कस्टका कुरादेखि लिएर जति तेल भरिएको छ, त्यो यहाँ आउँदा बिचैमा चोरिने त्यसले हुने गरेको जुन नोक्शानी कति भएको छ, त्यो हिसावकिताव हुन्छ कि हुँदैन ? यी सबै कुराहरुको बारेमा सम्बन्धित निकायमा म पनि बुझौँला । प्रधानमन्त्रीको ध्यानाकर्षण पनि गराउनेछु ।’
