कसैले जालझेल गरेर फेरि प्रधानमन्त्री बन्छु भनेर नलागे हुन्छ : माधव नेपाल
नेकपा एमालेका वरिष्ठ नेता माधव कुमार नेपालले संविधानलाई कुल्चिने काम गर्ने विरुद्ध आफूहरू चुप लागेर नबस्ने बताएका छन् ।
सर्वोच्च अदालतले गलत काम सच्चाइएको स्मरण गर्दै उनले कसैले जालझेल गरेर फेरि प्रधानमन्त्री बन्छु भनेर नलागे हुने टिप्पणी गरेका छन् । पार्टी अध्यक्ष केपी शर्मा ओलीप्रति लक्षित गर्दै उनले अहङ्कारले मान्छेलाई पतनको बाटो डोहो¥याउने बताएका छन् ।
नेता नेपालले आफू विचारमा अडिग योद्धा रहेको भन्दै मैदान छोडेर भाग्ने कुरा नहुने बताएका छन् । शनिबार काठमाडौँमा अखिल फोर्सको बृहत् भेलालाई सम्बोधन गर्दै नेपालले आफू विचारमा अडिग योद्धा रहेको र कार्यकर्तालाई पनि त्यस्तै बन्न सुझाव दिँदै नेपालले आफूहरू मैदान छोडेर नभाग्ने बताएका हुन् । उनले निरङ्कुश र स्वेच्छाचारी प्रवृत्तिको विरोध गर्दै मनपरी, बेलगाम, अराजक भएर नेतृत्व नचलोस् भनेर होसियार बनाउन कार्यकर्ताले भूमिका खेल्नुपर्ने उल्लेख गरे ।
नेता नेपालले आफूलाई विचारहीन र सिद्धान्तहीन व्यक्तिहरूको भीड तयार गर्न नचाहेको जिकिर गरेका छन् । उनले अव नेपालमा राजतन्त्र फर्काउने दिवास्वप्त नदेख्न चेतावनी दिएका छन् ।
