खेलकुदमन्त्री श्रेष्ठको सम्पत्ति: ३ लाखको घडी,  सेयर बजारमा करोड बढी लगानी

काठमाडौं– युवा तथा खेलकुद मन्त्री विराजभत्त श्रेष्ठ सम्पत्तिमा मध्यमस्तरका देखिएका छन् । प्रधानमन्त्री तथा मन्त्रिपरिषद्को कार्यालयले मंगलबार सार्वजनिक गरेको सम्पत्ति विवरणअनुसार युवा तथा खेलकुद मन्त्री विराजभत्त श्रेष्ठसँग काठमाडौंमा जग्गा, सुन, नगद र शेयर रहेको देखिएको छ ।

सार्वजनिक विवरणअनुसार श्रेष्ठको काठमाडौंमा ६ आना जग्गा रहेको छ । यस्तै उनीसँग १५ तोला सुन र ५० तोला चाँदी रहेको छ । विभिन्न बैंकहरूमा उनले आफ्नै नाममा ६० लाख भन्दा धेरै नगद मौज्दात रहेको उल्लेख गरेका छन् भने श्रीमतीको नाममा पनि २५ लाख मौज्दात रहेको विवरणमा उल्लेख गरेका छन् ।

मन्त्री श्रेष्ठको १ करोड ९ लाख ८० हजार ५ सय ९ रुपैयाँ शेयरमा पनि लगानी रहेको छ भने सवारी साधनको रुपमा ८५ लाखको टोयटाको ल्याण्ड क्रुजर, ८ लाखको मोटरसाइकल, २ लाख ४६ हजारको स्कुटर र १९ लाख ७५ हजारको विद्युतीय गाडी रहेको विवरणमा उल्लेख छ ।

यस्तै टिसोट, स्वाच, अर्मानी लगायत ब्रान्डका ३ लाख रुपैयाँ बराबरका घडी पनि मन्त्री श्रेष्ठले सम्पत्तिको रुपमा विवरण सार्वजनिक गरेका छन् ।

 उनले आफ्नै बुबा विरेन्द्रभक्त श्रेष्ठसँग २० लाख रूपैयाँ ऋण लिएका छन्। २०७० सालमा लिएको ऋण अझै फिर्ता नगरेको विवरण उनले उल्लेख गरेका छन्।