नेपाल टेलिकमका फाइबर सेवाग्राहीलाई ५० एमबीपीएस निःशुल्क डाटा

एनटी फाइबर प्रविधि अन्तर्गत हाल टेलिफोन सेवा मात्र प्रयोग गरिरहेका सेवाग्राहीले अब परीक्षणको रूपमा एक महिनासम्म डाटा सुविधा निःशुल्क प्रयोग गर्न सक्नेछन् ।

नेपाल टेलिकमले आज (२०८० मङ्सिर २५) देखि लागु हुने गरी एनटी फाइबर प्रविधि अन्तर्गत टेलिफोन सेवा मात्र प्रयोग गरिरहेका सेवाग्राहीलाई प्रोमोसनल अफरका रूपमा एक महिना सम्म निःशुल्क ५० एमबीपीएस स्पिडको डाटा सेवा उपलब्ध गराउने भएको छ ।

सो सेवा प्रयोग गर्नका लागि १९८–१ (१९८ मा डायल गरी प्राप्त सन्देशपश्चात् फेरि १ डायल गरी) मा अनुरोध गर्न सकिन्छ । त्यसै गरी नजिकको दूरसञ्चार कार्यालयमार्फत पनि सो सुविधा लिन सकिन्छ ।

एक जना ग्राहकका लागि सो सुविधा एक पटक मात्र उपलब्ध हुनेछ । एक महिना भन्दा बढी समय सम्म सो सेवा निरन्तर प्रयोग गर्ने इच्छा भएमा सेवाग्राहीले १९८–१ मा कल गरी वा नजिकको दूरसञ्चार कार्यालयमा सम्पर्क गरी सशुल्क रूपमा सो सेवा प्रयोग गर्न सक्नेछन् ।