• २०७६ कार्तिक ३ आइतबार

पहिलोपटक जर्मन–नेपाल व्यापारिक सम्मेलन शुरु

काठमाडौँ,  नेपालमा जर्मनीको लगानी अभिवृद्धि गराउन पहिलो पटक काठमाडौँमा जर्मन–नेपाल व्यापारिक मञ्चको सम्मेलन शुरु भएको छ । लगानी बोर्ड, जर्मन दूतावास र नेपाल जर्मन चेम्बर अफ कमर्श एण्ड इण्डष्ट्रिजको संयुक्त आयोजनामा भएको सो सम्मेलनमा जर्मनको कोलोन नगरका उपप्रमुख हान्स वेयरनर ब्रार्चको नेतृत्वमा आएको १५ सदस्यीय व्यापारिक प्रतिनिधिमण्डलसहित जर्मनीको सहयोगमा नेपालमा सञ्चालित विभिन्न परियोजना तथा उद्योगी व्यवसायीको सहभागिता छ ।    
    
सम्मेलनमा नेपालका लागि जर्मनी राजदूत रोलाल्ड सेफरले राजनीतिक स्थायित्वसँगै नेपाल आर्थिक समृद्धिको बाटोमा हिँड्न थालेकाले यहाँ लगानी र व्यापारको प्रसस्त सम्भावना रहेको बताए । उनले भने, “विकास पूर्वधार, सांस्कृतिक आदानप्रदान र पर्यटनका क्षेत्रमा साझेदारी बढाउन सकिनेछ । यसमा निजी व्यवसायले आयाम थप्नेछ ।”    
    
उद्योग, वाणिज्य तथा आपूर्ति मन्त्रालयका सचिव वैकुण्ठ अर्यालले सरकारले वैदेशिक लगानी आकर्षित गर्न मौजुदा कानून परिमार्जन, नयाँ कानूनको तर्जुमा गर्नुका साथै संस्थागत व्यवस्था गरेकाले लगानीको अवसर प्रशस्त रहेको बताए । उनले नेपाली वस्तु निर्यातको हिसाबले जर्मनी तेस्रो ठूलो देश रहेको उल्लेख गर्दै सन् २०२० लाई नेपाल भ्रमण वर्ष मनाउने सन्दर्भमा जर्मनीबाट ठूलो सख्यामा पर्यटक आगमन हुने अपेक्षा गरे ।    
    
लगानी बोर्डका प्रमुख कार्यकारी अधिकृत महाप्रसाद अधिकारीले समृद्ध नेपाल र सुखी नेपालीको राष्ट्रिय आकांक्षा हासिल गर्न ठूलो लगानीको आवश्यकता पर्ने भएकाले वैदेशिक लगानी आकर्षित गर्न सरकारले उपयुक्त वातावरण निर्माण गरेको बताए । लगानी सम्मेलनले पहिचान गरेका १५ वटा आयोजनालाई कार्यान्वयन गर्न सकिएमा मुलुकको आर्थिक समृद्धिमा सहयोग पुग्ने उनको भनाइ छ ।    
    
नेपाल–जर्मन चेम्बर अफ कमर्श एण्ड इण्डष्ट्रिजका अध्यक्ष अनुप मल्लले स्मार्ट र हरित अर्थतन्त्र निर्माण गर्न व्यापार र लगानी अभिवृद्धिमा जोड दिए । पछिल्लो समय लगानीमैत्री वातावरण बनेकाले जर्मनीका उद्योगी व्यवसायीलाई लगानी गर्न आग्रह गर्दै उनले प्राविधिक एवं दक्ष जनशक्ति उत्पादनमा जोड दिनुपर्ने धारणा राखे ।    
    
नेपाल आर्थिक मञ्चका संस्थापक सञ्जीव शाक्यले भूगोल, जनसङ्ख्या र परिवेशले गर्दा नेपालमा समृद्धिको प्रशस्त सम्भावना रहेको उल्लेख गरे । सो सम्मेलन भोलिसम्म सञ्चालन हुनेछ ।     
    
कोलोनका मेयर काठमाडौँमा    
    
नेपाल भ्रमणमा आएका जर्मनीको कोलोन नगरका उपप्रमुख हान्स वेयरनर ब्रार्चले नेपालमा जर्मनीको लगानी अभिवृद्धि गर्ने प्रशस्त सम्भावना रहेको बताउँदै आगामी दिनमा यहाँको नगरपालिकासँग सहकार्य गरी अगाडि बढ्ने जानकारी दिए ।    
    
संक्षिप्त कुराकानीमा उनले नेपाल–जर्मनीबीच कूटनीतिक सम्बन्ध स्थापना भएको ६० वर्षको अवधिमा जनस्तरमा समेत सम्बन्ध विस्तार भएको र यसलाई आर्थिक क्षेत्रमा अझ बढाउन जर्मनीका उद्योगी व्यवसायी उत्साही रहेका छन् भने ।    
    
उपप्रमुख ब्रार्चको ललितपुर महानगरपालिका र कीर्तिपुर नगरपालिकाको भ्रमण गर्नु भई यहाँको कला, संस्कृति र सम्पदाबाट आफू निकै प्रभावित भएको र यी नगरपालिकासँग भगिनी सम्बन्ध स्थापना गर्न इच्छुक रहेको बताए । ललितपुर महानगरपालिकाका प्रमुख चिरिकाजी महर्जनले उपप्रमुख ब्रार्चलाई नगरको साँचो प्रदान गरेका थिए ।

प्रतिकृया दिनुहोस

सम्बन्धित समाचार

ताजा अपडेट

समाचार