वर्षौंदेखि सित्तैमा हड्पेका टहराका कारण पशुपति क्षेत्र विकास कोषको करोडौँ आम्दानीको स्रोत गुम्दै (भिडियो सहित)

विमल खड्का टिभी अन्न्पूर्ण काठमाडौँ
पशुपतिनाथ मन्दिर नेपालका लागि मात्र होइन, विश्वभरकै हिन्दुहरूले पुज्ने पवित्र तीर्थस्थल मन्दिर । नेपाल भारतसहित जत्ति पनि हिन्दु धर्मावलम्बी छन् उनीहरूको आस्थाको केन्द्रबिन्दु । आराध्यदेव पशुपतिको दर्शन गरेपछि मात्र धर्म दर्शन पूरा भएको मान्छन् । तर, यही पवित्र भूमि पशुपतिभित्रै पूजाको लागि बेचिने फुलहरूमै दलाली हुने गरेको तथ्य भेटिएको छ । पशुपतिनाथ आसपासमा अव्यवस्थित रूपमा रहेका टराहरुबाट बेचिने गरेका पुल तथा अन्य सामानहरूमा व्यापारीहरूको बिगबिगीले पशुपतिनाथ क्षेत्र विकास कोषले हैरानसमेत व्यहोर्नु परेको छ ।
करिब १ सय ५० भन्दा बढी टहराहरू भएको पशुपतिनाथ वरपर फुलप्रसाद बेच्न तँछाडमछाड गर्ने व्यापारीहरू व्यापार गरेबापत पशुपति क्षेत्र विकास कोषलाई भाडा तिर्नुपर्छ भन्नेमा समेत अनविज्ञजस्तै छन् । बरु राजनीतिक दलको दलाली गर्ने सीमित व्यक्तिले टहरा बनाएको भन्दै पसलेमार्फत आफैले रकम असुल्ने गरेको समेत देखिएको छ । मन्दिर वरपर रहेका टहरे पसलका व्यापारीहरूले पशुपति क्षेत्र विकासलाई एक रुपैयाँ पैसा नतिरी आफ्ना हैकम जमाएर बसेका छन् ।

देशका विभिन्न जिल्लाबाट व्यवसाय सञ्चालन गर्न राजधानीमा आएका कैयौँ मानिसले पशुपति क्षेत्र वरपर टिनका टहराहरूबाटै दैनिक लाखैको कारोबार गरिरहेका छन् । तर दैनिक फुल प्रसाद र अन्य धार्मिक सामाग्री बेचेर लाखौँ कमाउनेहरु भने पशुपति क्षेत्रलाई भाडा तिर्नुपर्छ भन्ने समेत जानकार छैनन् । बरु दैनिक लाखौँ घाटामा चलेको पशुपति क्षेत्र विकास कोषले कहिलेकाहीँ भाडाको विषय उठाए यसलाई पाखुराकै भरमा वा राजनीतिक दलको आडमा थामथुम पार्ने गरेको स्रोत बताउँछ ।
पशुपतिनाथ क्षेत्र विकास कोषको रेकर्डमा सो क्षेत्रमा रहेका दुई सय पसलमध्ये २५ पसल बाहेकले भाडा नतिरी व्यापार गर्दै आएको छन् । मासिक ७ हजार ५ सय भाडा बुझाउनेगरि पशुपति क्षेत्र विकास कोषले २५ पसलबाट भाडा लिएको भए पनि सोही अनुपातमा अन्य दुई सय पसलबाट आउने भाडा उठाउन नसकेको सदस्य सचिव डा प्रदीप ढकालले जानकारी दिए ।

लामो समयदेखि भाडा नतिरी बसेका पसलेहरूको कारण कोषको मोटो आम्दानीको स्रोत खेर गईरहेकाले अहिले पर्यटन प्रहरी र कोषका सुरक्षाकर्मीहरूको सहयोगमा उनीहरूलाई तत्काल हटाउने तयारी गरेको सुनाए । यहाँबाट हटेको व्यवसायीहरूलाई विकल्प स्वरूप कोषले सोही ठाउँभन्दा केही पछाडि बन्दै गरेका १ सय २५ टहरामा सार्ने तयारी छ । तर दुईसय बढीले रोजीरोटी चलाउदैं आएका टहरा पसल विस्थापित गर्न कोषले निर्माण गर्न थालेका सटर समेत प्रयाप्त देखिँदैन ।
२०७३ ÷७४ मा पशुपतिनाथ क्षेत्र विकास कोषको हाताभित्र सञ्चालित २ सय बढी पसलमध्ये भाडा बुझाउने २३ पसलबाट मात्रै ७० लाख ९१ हजार ८ सय ६४ रुपैयाँ आम्दानी गरेको छ ।

तर बाँकी रहेका १ सय ७७ पसलबाट हुनसक्ने वार्षिक झन्डै दुई करोड आउने स्रोतबारे कोष बेखबर जस्तै छ । पशुपति क्षेत्र कोष विकास कोषको प्रमुख संरक्षक प्रधानमन्त्री केपी शर्मा ओली र अध्यक्ष संस्कृति, पर्यटन तथा नागरिक उड्डयन मन्त्री रबिन्द्र अधिकारी छन् । तर, दलहरूकै संरक्षणमा छाडेको साढेझैँ गर्जर्ने व्यापारीले हड्पेका टहराका कारण पशुपति क्षेत्र विकासको कोषको करोडको आम्दानीको स्रोत लावारिस पारिनुमा दोषी को ? यो जन जनको प्रश्न हो

भिडियो हेर्नुहोस्

Related posts

Leave a Comment