इन्गेजमेन्ट ताेडिएपछि मृत्यु प्रकरण : युवक हिरासतमा

काठमाडौं । धुम्बाराहीमा आफैंलाई पेट्रोल खन्याएर जलाएकी महिलाको मृत्यु प्रकरणमा पक्राउ परेका चार जनामध्ये तीनजना थुनामुक्त भएका छन् ।

मृतक नुवाकोटी २७ वर्षीया पुष्पा न्यौपानेसँग इन्गेजमेन्ट गरेका युवक २९ वर्षका सुधन संग्रौला चाहिँ हिरासतमै छन् । जिल्ला प्रहरी परिसर काठमाडौंका एसपी दिनेशराज मैनालीका अनुसार जिल्ला अदालत, काठमाडौंले सुधनबाहेक अन्यलाई हिरासतमा राख्न अनुमति दिएन ।

प्रहरीले सोमबार सुधनसहित उनका बुबा ५७ वर्षका दिनेश संग्रौला, आमा बिन्दु संग्रौला र २९ वर्षका मधु संग्रौलालाई पक्राउ गरेको थियो ।

सुधन र पुष्पाबीच १८ भदौमा विवाह गर्नका लागि बुद्धनगरमा इन्गेजमेन्ट भएको थियो । एक वर्षभित्र विवाह गर्ने सहमति भएपनि शनिबार मात्रै केटा पक्षले घरमा पुगेर जनै सुपारी र दक्षिणा फिर्ता गर्दै इन्गेजमेन्ट तोडिएको घोषणा गरेको थियो । त्यसको भोलिपल्ट न्यौपानेले सुधनको घर अगाडि गएर आफनो शरीरमा आगो लगाएकी थिइन् । प्रहरीले घटनाको थप कारणबारे अनुसन्धान गरिरहेको छ ।