न्युजिल्यान्ड इङ्ग्ल्यान्डसँग पराजित, रोचक बन्यो सेमिफाइनल समिकरण

काठमाण्डौ – आईसीसी टी–२० विश्व कप क्रिकेटमा इङ्ग्ल्यान्डले न्युजिल्यान्डलाई हराएको छ । ब्रिसबेनमा आज मङ्गलवार भएको खेलमा इङ्ग्ल्यान्डले न्युजिल्यान्डलाई २० रनले हरायो ।

इङ्ग्ल्यान्डले दिएको एक सय ८० रनको लक्ष्य पछ्याएको न्युजिल्यान्डले निर्धारित २० ओभरमा छ विकेट गुमाएर एक सय ५९ रनमात्रै बनाउन सक्यो । उसका लागि ग्लेन फिलिप्सले सर्वाधिक ६२ रन बनाए । बलिङतर्फ इङ्ग्ल्यान्डका क्रिस वोक्स र साम कुरनले दुईरदुई विकेट लिए ।

यसअघि पहिले ब्याटिङ गरेको इङ्ग्ल्यान्डले निर्धारित २० ओभरमा छ विकेट गुमाएर एक सय ७९ रन बनायो । उसका लागि जोस बटलरले ७३ र एलेक्स हेल्सले ५२ रन बनाए । बलिङतर्फ न्युजिल्यान्डका लकी फर्गुसनले दुई विकेट लिए ।

यो जितसँगै इङ्ग्ल्यान्ड चार खेलमा पाँच अङ्कसहित समूह १ को तालिकाको दोस्रो स्थानमा उक्लिएको छ । न्युजिल्यान्डको पनि उति नै अङ्क भए पनि नेट रनरेटका आधारमा शीर्ष स्थानमा छ ।