कोटेश्वर र थापागाउँमा सार्वजनिक बसमा ढुंगा प्रहार

काठमाडौं– काठमाडौं उपत्यकामा सामान्य रुपमा सवारी साधन सञ्चालन भइरहेको महानगरीय ट्राफिक प्रहरी कार्यालयले जनाएको छ । बिहान केही कम सवारी साधन चले पनि अहिले सडकमा सवारी साधनहरुको संख्या बढेको ट्राफिक प्रहरीले जनाएको छ ।

आज बिहान थापागाउँमा नेपाल यातायातको एउटा बसमा ढुंगा प्रहार भएको छ । त्यसअघि बिहान कोटेश्वरको भाटभटेनी नजिक मोटरसाइकलमा सवार एक व्यक्तिले माइक्रो बसमा ढुंगा प्रहार गरेका थिए । ढुंगा प्रहारबाट बा ३ ख ७९०६ नम्बरको माइक्रो बसको अगाडिको सिसा फुटेको छ । कोटेश्वरमै बा ४ ख ९३९४ नम्बरको बसको सिसा पनि फुटाइएको छ ।

कोटेश्वर र थापागाउँका दुबै घटनामा ठूलो क्षति नभएको महानगरीय ट्राफिक प्रहरी कार्यालयले जनाएको छ ।

नेत्रविक्रम चन्द विप्लव नेतृत्वको नेकपाले आज नेपाल बन्द आह्वान गरे पनि काठमाडौं उपत्यकामा प्रभाव खासै नपरेको प्रहरीको भनाइ छ । सडकमा प्रहरीको उपस्थित बाक्लो छ ।