राष्ट्रपति भण्डारीको विरोध भएकोप्रति प्रधानमन्त्री असन्तुष्ट (भिडियो)

Sunrise Bank Middle Size

प्रधानमन्त्री केपी शर्मा ओलीले राष्ट्रपति विद्यादेवी भण्डारीको विरोध भएकोप्रति असन्तुष्ट व्यक्त गरेका छन् । राष्ट्रपति गणतन्त्रको प्रतीक हो भन्दै उनले राष्ट्रपतिको विरोध गर्नेहरुले गणतन्त्रलाई कमजोर बनाउन खोजेको दावी गरे ।

उनले आफूले गरेका सिफारिसमा आफू जवाफदेही भएको बताउँदै त्यसमा राष्ट्रपतिलाई अनावश्यक रुपमा विवादमा नमुछ्न पनि आग्रह गरेका छन् । ‘मैले गरेको सिफारिसमा म जवाफदेही छु । पहिला पनि मैले गरेको हो । अहिले पनि मैले गरेको हो सिफारिस । यहाँ संविधानको व्याख्या गर्ने स्वतन्त्र न्यायपालिका होलान्,’ ओलीले भने ।

उनले मन्त्रिपरिषद्को सिफारिसमा राष्ट्रपतिले निर्णय गर्ने भएकाले राष्ट्रपतिका काम, कर्तव्य र अधिकारबारे सामान्य जानकारी पनि नराखेर विवादमा मुछ्न खोजिएको भन्दै असन्तुष्टि पोखे ।

त्यस्तै प्रधानमन्त्री ओलीले वैकल्पिक सरकार बनेमा आफूले स्वागत गर्ने बताएका छन् ।

‘म फेरि पनि आग्रह गर्छु तपाईंहरु वैकल्पिक सरकार बनाउनुस् । बिना कुनै षड्यन्त्र म दलका नेताहरुलाई आग्रह गर्छु बनाउनुस् वैकल्पिक सरकार । म त्यसलाई स्वागत गर्नेछु । त्यसमा मेरो रचनात्मक सहयोग हुनेछ । सहयोगी भावनाका साथ कोरोना महामारी तथा अन्य कुरामा मेरो दल प्रस्तुत हुनेछ,’ उनले भने । वैकल्पिक सरकार बनाउन नसके आफूलाई समर्थन गर्न पनि उनले दलहरुलाई आग्रह गरेका छन् ।

Prabhu Bank Middle Size
Kumari Bank Middle Size
Loading...