राैटहटबाट नक्कली नोटसहित चारजना युवा पक्राउ

रौतहटमा नक्कली नेपाली नोटसहित चारजना युवक पक्राउ परेका छन् । मेलाको भिडमा नक्कली नोट दिएर सामान खरिद गरेका चारजना युवक पक्राउ परेका हुन ।

पक्राउ पर्नेमा बौधीमाई नगरपालिका ४ ईनरवारिका २० वर्षीय संतोष पटेल, २९ वर्षीय देवनारायण दास, २२ वर्षीय फुल महमद र २४ वर्षीय नौषाद आलम रहेको जिल्ला प्रहरी कार्यालय रौतहटका इन्स्पेक्टर दिनेश कुंवरले बताए ।

दुई दिन अघि नागपञ्चमीको अवसरमा बौधीमाई नगरपालिका ३ जिउताही टोलमा लागेको मेलामा नक्कली नोट दिएर सामान खरिद गर्दा पसलेले इलाका प्रहरी कार्यालय कोपवा पिपरियामा निवेदन दिएका थिए ।

सोही निवेदनका आधारमा प्रहरीले सन्तोष पटेललाई पक्राउ गरी चेकजाँच गर्दा एक हजारको १ थान नक्कली नोट फेला परेको तथा पसलेबाट एक हजारको १९ थान गरी कुल २० हजार नक्कली नोट फेला परेको थियो ।

प्रहरीको अनुसन्धानबाट पटेलसँगै अन्य तिनजना पनि नक्कली नोटको कारोबार गर्दै आएको खुलेको हो । पक्राउ परेका चारैजनामाथि आवश्वक कारवाही प्रक्रिया अगाडि बढाइएको जिल्ला प्रहरी कार्यालय रौतहटले जनाएको छ ।

फेसबुकबाट प्रतिक्रिया
सम्बन्धित समाचार