आगामी चुनाव एक्लै जित्ने गरी तयारी गर्न कार्यकर्तालाई एमालेको निर्देशन

नेकपा एमालेले स्थानीय तहको मतको समीक्षा गर्दै बहुमतका लागि १६ प्रतिशत मत अपुग रहेको निष्कर्ष निकालेको छ । एमालेले आफ्नो तल्लो कमिटीहरुलाई जनमत बढाउनका लागि आवश्यक कार्यक्रम सञ्चालन गर्न निर्देशन दिएको छ ।

एमालेले स्थानीय तह चुनावको समीक्षा गर्दै ३४ प्रतिशत मत प्राप्त गरेर सबैभन्दा ठूलो दल बनेको दाबी गरेको छ । ‘ यो स्थानीय निर्वाचनमा सत्ता गठबन्धनको घेराबन्दी, आक्रमण र राज्य शक्तिको दुरुपयोगका बाबजुद सर्वाधिक लोकप्रिय मत (३४ प्रतिशत)सहित हाम्रो पार्टीलाई पहिलो शक्तिको रूपमा स्थापित भएको छ,’ अपानीमा भनिएको छ ।

एमालेले जारी गरेको अन्तर पार्टी निर्देशनमा मत वृद्धिका लागि नयाँ पुस्तामा विशेष ध्यान दिने र मतको संरक्षण गर्ने योजना बनाउन भनेको छ । ‘हामीलाई बहुमत पुग्न करिब १६ प्रतिशत मत अपुग छ, त्यसलाई वृद्धि गर्न सकिन्छ र त्यसका लागि ठोस योजनाका साथ अघि अगाडि बढ्ने, अपानीमा भनिएको छ, ‘नयाँ पुस्तालाई विशेष ध्यान दिने, पार्टीको जनाधार बलियो भएको ठाउँमा जनाधारलाई सुदृढ गर्ने । कमजोर जनाधार भएको ठाउँमा जनाधार विस्तारमा जोड दिने ।’

त्यसैगरी अपानीमा सत्ताका लागि गोटी चाल्दा अहिलेको सत्ता गठबन्धनलाई भत्काउन सकिने निष्कर्ष एमालेको छ । तर अहिले गठबन्धन नै चुनावमा जानसक्ने सम्भावना रहेको भन्दै एक्लै चुनाव जित्नेगरी तयारी गर्न भनेको छ ।

पारस्परिक लाभ भएको महसुस गरेसम्म गठबन्धन कायम रहन सक्ने निष्कर्ष निकाल्दै एमालेले अपानीमा भनेको छ, ‘पारस्परिक लाभ भएको महसुस गरेसम्म गठबन्धन कायम रहन सक्छ । हाम्रो तयारी यस्तो अवस्थामा एक्लै लड्ने र जित्ने हिसाबको हुनुपर्छ । हामीसँग सही नीति र कार्यक्रम छन्, त्यसैले एक्लै लड्ने र पराजित गर्ने सामर्थ्य राख्छौं भन्ने आत्मविश्वास जगाउने ।’