एसपीपीमा संलग्न नहुने जानकारी अमेरिकालाई दिन सरकारलाई निर्देशन

अमेरिकी हिन्द प्रशान्त रणनीतिको हिस्सा भएको निष्कर्ष

प्रतिनिधिसभा अन्तरगत अन्तराष्ट्रिय सम्बन्ध समितिले अमेरिकी राज्य साझेदारी कार्यक्रम (एसपीपी)मा नेपाल संलग्न नहुने कुरा स्पष्ट रुपमा औपचारिक ढंगले अमेरिकालाई पत्र पठाउन सरकारलाई निर्देशन दिएको छ ।

शुक्रबार सरोकारवालासँगको छलफलपछि समितिले एसपीपी अमेरिकी हिन्द प्रशान्त रणनीतिको हिस्साको रुपमा रहेको तथ्य खुलेकाले उक्त कार्यक्रममा नेपाल उक्त कार्यक्रममा सहभागी हुन नहुने निष्कर्ष निकालेको हो ।

‘हालै अमेरिकी राज्य साझेदारी कार्यक्रम (एसपीपी) मा नेपालको संलग्नता सम्बन्धमा सार्वजनिक भएका कुराहरु एवं विवादास्पद विषयमा नेपाल सरकारको औपचारिक धारणा निर्णयको रुपमा आउनुपर्छ’, समितिले निर्णय सार्वजनिक गर्दै भनेको छ, ‘अमेरिकी राज्य साझेदारी कार्यक्रम (एसपीपी) अमेरिकी हिन्द प्रशान्त रणनीतिको हिस्साको रुपमा रहेको तथ्य संयुक्त राज्य अमेरिका सरकारद्वारा प्रकाशित रणनीतिक प्रतिवेदनमा उल्लेख भएकाले उक्त कार्यक्रममा अब उप्रान्त नेपाल संलग्न नहुने कुरा स्पष्ट रुपमा औपचारिक किसिमले अमेरिकालाई अवगत गराउन नेपाल सरकार, परराष्ट्र मन्त्रालयलाई निर्देशन दिने ।’

शुक्रबार समितिको छलफलमा परराष्ट्रमन्त्री डा नारायण खड्का, नेपाली सेनाका प्रधानसेनापति प्रभुराम शर्मा, परराष्ट्र मन्त्रालयका सचिव भरतराज पौड्याल, रक्षा मन्त्रालयका सचिव किरणराज शर्मा लगायत सहभागी थिए ।

​त्यस्तै बैठकले प्रधानमन्त्री शेरबहादुर देउवाको आसन्न अमेरिका भ्रमणका सिलसिलामा सोही विषयलाई ध्यानमा राख्दै कुनैपनि विवादास्पद एवं स्वतन्त्र र असंलग्न परराष्ट्र नीतिसँग मेल नखाने सहमति वा कार्य नगर्न निर्देशन दिएको छ । बैठकले एसपीपीबारे नेपाल सरकारको रक्षा मन्त्रालय, परराष्ट्र मन्त्रालय र नेपाली सेनाले अमेरिकासँग गरेका सहमति वा पत्राचार ७ दिनभित्र अन्तर्राष्ट्रिय सम्बन्ध समितिलाई उपलब्ध गराउन सरकारलाई निर्देशन दिएको छ ।

फेसबुकबाट प्रतिक्रिया
सम्बन्धित समाचार