विमान दुर्घटनामा ज्यान गुमाएका एकै परिवारका सात जनाको अन्त्येष्टि

तारा एयर दुर्घटनामा ज्यान गुमाएका एकै परिवारका सात जनाको आज (बिहीबार) अन्तिम संस्कार गरिएको छ । स्वयम्भूमा गरिएको अन्तिम संस्कारमा नेकपा एकीकृत समाजवादीका सम्मानित नेता झलनाथ खनाल पुगेर पार्टीको धनुषा जिल्ला कमिटीका सदस्य रहेका राजन गोलेको शवमा पार्टीको झण्डा ओढाएर अन्तिम बिदाइ गरेका थिए ।

गत आइतबार पोखराबाट जोमसोम जाने क्रममा तारा एयरको उक्त विमान मुस्ताङको थासाङ गाउँपालिका २ मा दुर्घटनामा परेको थियो ।दुर्घटनामा धनुषाका मकरबहादुर तामाङ, सुकुमाया तामाङ, राजन गोले, इन्द्रबहादुर गोले, राममाया गोले, पुरुषोत्तम गोले र तुलसादेवी तामाङको मृत्यु भएको थियो ।शवको पोस्टमार्टम सकिएपछि बिहीबार टिचिङ अस्पतालबाट आफन्तलाई शव हस्तान्तरण गरिएको थियो । शव हस्तान्तरण गरेलगत्तै मृतकको अन्तिम संस्कार गरिएको हो ।