सिरहामा बाबुछोराको हत्या आरोपमा बुहारीसहित तीन पक्राउ

सिरहाको अर्नमा गाउँपालिकामा एक साताअघि भएको बाबुछोराको हत्यामा संलग्न रहेको आरोपमा प्रहरीले मृतकका बुहारीसहित तीन जनालाई पक्राउ गरेको छ ।

आफ्नै घरमा सुतिरहेको अवस्थामा गत जेठ ७ गते राति अर्नमा गाउँपालिका–१ महनौरका ६० वर्षीय चन्देश्वर पाल र उनको १९ वर्षीय छोरा सन्तकुमारको धारिलो हतियार प्रहार गरी हत्या भएको थियो । सो घटनामा संलग्न रहेको आरोपमा प्रहरीले मृतक चन्द्रेश्वरकी साहिली बुहारी २६ वर्षीया शान्तिदेवी, स्थानीय ४८ वर्षीय जनिफ मियाँ र सिरहाको गोलबजार नगरपालिका–४ का ६५ वर्षीय बेचु पाललाई पक्राउ गरेको हो ।

घटनालगत्तै सङ्घीय प्रहरी एकाइ कार्यालय जनकपुर, जिल्ला प्रहरी कार्यालय सिरहाको संयुक्त अनुसन्धान टोलीले अनुसन्धान थालेको थियो । घटनामा संलग्न रहेको पाइएपछि तीनै जनालाई पक्राउ गरिएको प्रहरी नायब उपरीक्षक सुभाष बुढाथोकीले जानकारी दिए । उक्त घटनामा प्रयोग भएको खुकुरी र खुकुरी राखेको झोला र चार थान मोबाइलसमेत बरामद गरिएएको उनले बताए । पारिवारिक रिसिइबीका कारण बाबुछोराको हत्या भएको खुलेको छ । पक्राउ परेका तीनै जनालाई कर्तव्य ज्यान मुद्दामा जिल्ला अदालबाट सात दिनको म्याद थप गरी अनुसन्धान भइरहेको प्रहरीले जनाएको छ ।

यसरी भयो हत्याकाण्ड
प्रहरीले दिएको जानकारी अनुसार मृतक सन्त पालको जेठ ११ गते मोरङ जिल्ला बस्ने यूवतीसँग विवाह तय भएको थियो । शान्तिका पति वैदेशिक रोजगारीमा छन् । शान्तिको घरपरिवारसँग सम्बन्ध ठीक नरहेको कारण गोलबजारमा डेरा गरी बस्दै आएकी छन् । देवर सन्त पालको विवाहमा शान्तिलाई निम्ता थिएन ।

सासुससुराले शान्तिलाई अंशसमेत नदिएका कारण उनी क्रुद्ध थिइन् । पहिलाको पारिवारिक रिसईवी र बिहेमा निम्ता नदिएको रिसमा शान्तिले जेठ पहिलो साता ससुरा र देवरको हत्याकै योजना बुनिन्।

जनिफ मियाँ र बेचु पालसँग सासु देवरको हत्याको योजना बनाइन् । बेचुको छोराको विवाह पनि पहिला सन्तको विवाह हुने बेहुलीसँग तय थियो । तर उनकै छोराले नमान्दा बिहे टलेको थियो । सोही कारण मृतक चन्द्रदेवसँग बेचुले रिस पालेका थिए ।

शान्तिका पति विदेश जाने बेला श्रीमतीलाई केही समस्या परे हेरविचार गरिदिनु भनेर जानिफ मियाँलाई जिम्मेवारी सुम्पेका थिए ।

तीनैजनाको सल्लाहले शान्ति आफ्ना ससुरा र देवरलाई हत्या गर्ने निष्कर्षमा पुगिन् । शान्तिले ससुरा देवरको हत्या गराउन जानिफ मियाँ र बेचु पाललाई ५० हजार रुपैयाँको सुपारी दिने बचन दिइन् । हत्या गरेपछि पैसा दिने शान्तिले भनेकी थिइन् ।

११ गते बिहे रहेकामा ७ गते राति नै सो घटना गर्न चन्द्रदेवकै घर छेउमा रहेको राजदेवी मन्दिरमा दुवै जना भेट्ने योजना थियो । हत्या गर्नको लागि जनिफ मियाँले बन्चरो ल्याउने र बेचु पालले खुकुरी लिएर जाने तय भएको थियो ।

बेचु पाल झोलामा खुकुरी लिएर मन्दिरमा पुगे । तर जानिफ पुगेनन् । सो घटना एक्लै बेचुले नै गर्ने मनसाय बनाए । मध्य रातिसम्म घरमा चन्द्रदेवको घरमा महिलाहरुले विवाहको गीत गाइरहँदा बेचु केहीबेर मन्दिरमा आराम गरे ।

गीत बन्द भएपछि बेचु पाल घरमा पुगेर पहिला गोठमा सुतिरहेका चन्द्रदेवलाई गर्धनसहित विभिन्न भागमा खुकुरी प्रहार गरी हत्या गरे । त्यसपछि छोरा सन्त पाल सुतिरहेको कोठामा पुगेर खुकुरीले विभिन्न भागमा प्रहार गरी हत्या गरे ।

कोठामा बाहिरबाट चुकुल लगाई पुनः मन्दिरमा फर्केर राम्रोसँग हातमुख धोइ फर्केको घटनाको अनुसन्धानबाट खुलेको प्रहरीले जनाएको छ ।