उदयपुरमा ट्रक दुर्घटना हुँदा चार जनाको घटनास्थलमै मृत्यु

उदयपुरमा ट्रक दुर्घटना हुँदा चार जनाको घटनास्थलमै मृत्यु भएको छ । कटारी नगरपालिका–१४ भदौरेमा आइतबार राति करिब २ः३० बजेतिर ट्रक दुर्घटना हुँदा चार जनाको मृत्यु भएको हो ।

दुर्घटनामा ट्रकका चालक बाराको सिमरा–१ का ३५ वर्षीय सुजित घलान, सहचालक २५ वर्षीय नितेश खड्का, ट्रकमा सवार सिमरा–१ का १७ वर्षीय अनुज लामा र ३७ वर्षीय राजन तामाङको मृत्यु भएको प्रदेश १ ट्राफिक प्रहरी कार्यालय इटहरीले जनाएको छ ।

मकवानपुरको हेटौंडाबाट सोलुमा निर्माणाधीन हाइड्रोपावरको सिमेन्ट लोड गरेर सोलुखुम्बु जाँदै गरेको ना८ख ८२९७ नम्बरको ट्रक सिद्धिचरण लोकमार्गअन्तर्गत कच्ची सडकखण्डमा दुर्घटना भएको हो । ट्रक सडकबाट एक सय मिटरजति तल खसेको थियो ।