शुक्रबार पनि शेयर बजार खोल्ने नेप्सेको तयारी

सरकारले आगामी जेठ महिनादेखि हप्तामा २ दिन बिदा दिने निर्णय  गरेसँगै  नेपाल स्टक एक्सचेञ्ज (नेप्से) ले पनि शेयर बजारको तालिका हेरफेर गर्ने तयारी गरेको छ ।
आइतबार सार्वजनिक बिदा दिने सरकारको निर्णय अनुसार  नेप्सेले पनि आइतबारको सट्टा शुक्रबार शेयर कारोबार खुला गर्ने तयारी गरेको हो ।
हालको व्यवस्था आइतबारदेखि बिहीबारसम्म बजार खुल्ने रहेकोमा धितोपत्र नियमावलीमा संशोधन गरी  अब सोमबारदेखि शुक्रबार सम्म खुलाउने नेप्सेको तयारी छ ।
पेट्रोलियम पदार्थको खपत घटाउन नेपाल आयल निगमको प्रस्तावमा सरकारले जेठबाट लागू हुने गरी हप्तामा दुई दिन बिदा दिने निर्णय गरेको हो । यसअघि शनिवार मात्रै बिदा दिने सरकारको निर्णयपश्चात् शनिवार र आइतबार बिदा दिने भएको हो ।
हाल सातामा ५ दिन शेयर कारोबार हुँदै आएको छ । यदि धितोपत्रबाट स्वीकृति पायो भने शुक्रबार पनि शेयर कारोबार हुने छ । सातामा ५ दिन नै शेयर कारोबार हुनुपर्नेमा नेप्सेको जोड छ ।
विदेशी मुद्रा सञ्चिती घट्दो र शोधानन्तर घाटा बढ्दो स्थिति गएको भन्दै सरकारले सार्वजनिक विदाको समय बढाएको हो । यसअघि पेट्रोलियम पदार्थको आयात घटाउन सरकारी इन्धनमा २० प्रतिशतले कटौती गरेको थियो । त्यस्तै विदेशी विनिमय सञ्चिति बढाउन सरकारले विभिन्न १० वटा वस्तुमाथि पूर्ण रूपमा बन्देज लगाउने निर्णय गरेको थियो ।
फेसबुकबाट प्रतिक्रिया
सम्बन्धित समाचार