प्यूठानको झिमरुकमा टुट्यो सत्तागठबन्धनको गाँठो

प्यूठानको झिमरुक गाउँपालिकामा सत्तारुढ गठबन्धन टुटेको छ । राष्ट्रिय जनमोर्चाले यसअघि आफूले जितेको यो गाउँपालिकामा छाड्न नमानेपछि सत्तारुढ गठबन्धनमा आवद्ध दलले एक्ला–एक्लै चुनाव लड्ने निर्णय गरेका छन् ।

गत चुनावमा यो पालिकाको अध्यक्ष र उपाध्यक्षमा जनमोर्चा निर्वाचित हुँदा माओवादी दोस्रो, एमाले तेस्रो र कांग्रेस चौथो भएका थिए । नेकपा मसालका महामन्त्री मोहन विक्रम सिंहको गाउँ झिमरुकको नेतृत्व जनमोर्चालाई दिन कांग्रेस र माओवादी सहमत हुन सकेनन् ।

सत्तारुढ गठबन्धनमा आवद्ध दलको बैठकले गरेको निर्णयमा भनिएको छ, ‘तालमेलको विषयवस्तुमा छलफल गर्दा कुनै निष्कर्षमा पुग्न नसकेको हुँदा हामी गठबन्धनबीचका दलहरु मित्रवत् व्यवहार गरी निर्वाचनमा जाने निर्णय गरियो ।’