निर्वाचन अघि तालमेल स्वाभाविक होइन, पछि सरकार बनाउँदा तालमेल गरौंला : गगन थापा

नेपाली कांग्रेसका महामन्त्री गगन थापाले पार्टीका कार्यकर्ताहरू चुनावी तालमेलको पक्षमा नरहेको बताएका छन् ।काठमाडौं क्षेत्र नम्बर ४ मा आज आयोजित पार्टी कार्यक्रममा बोल्दै महामन्त्री थापाले पार्टीको तल्लो तह र माथिल्लो तहबीच चुनावी तालमेलबारे कुरा नमिलेको बताएका हुन् ।

‘पछिल्लो समय ५० जिल्लाका साथीहरूसँग सम्पर्कमा थिएँ। देशैभरका साथीहरू चुनावी तालमेलको पक्षमा हुनुहुन्न,’ उनले भने, ‘कांग्रेसलाई भोट दिने मतदाता पनि तालमेलका पक्षमा देखिएका छैनन्।’

तर चुनावी तालमेलबारे सत्तागठबन्धनमा गहन छलफल भइरहेको उनले बताए। महानगर र उपमहानगर भागबन्डाबारे आज पनि बालुवाटारमा छलफल छ।

‘मतदाताको मनोविज्ञान एक्लै लड्ने बरू जितिएन भने हारौंला भन्ने छ,’ थापाले भने, ‘निर्वाचन अघि नै तालमेल गर्ने कुरा स्वभाविक होइन। चुनावपछि सरकार बनाउन संख्या पुगेन भने तालमेल स्वभाविक हुने हो।’

उनले तालमेलको निर्णय केन्द्रबाट लाद्न नहुने बताए। कांग्रेसमा मात्र नभई माओवादीलगायत पार्टीका तल्ला कमिटीमा रहेर काम गरिरहेका कार्यकर्ताले चुनावी तालमेल नचाहेको उनको भनाइ थियो।

फेसबुकबाट प्रतिक्रिया
सम्बन्धित समाचार