भाइबुहारी बलात्कार गरेकाे आरोपमा जेठाजु पक्राउ

भाइबुहारीलाई बलात्कार गरेको आरोपमा जेठाजुलाई प्रहरीले पक्राउ गरेको छ । २२ वर्षीया भाइबुहारीलाई बलात्कार गर्ने ४२ वर्षीय जेठाजुलाई प्रहरीले नियन्त्रणमा लिएको जिल्ला प्रहरी कार्यालयले जनाएको छ ।

पीडितको परिचय खुल्ने भएकाले अभियुक्तको नाम गोप्य राखिएको र उनी सरकारी कर्मचारी रहेको प्रहरीले जानकारी दिएको छ । जेठाजु नाता पर्ने अभियुक्तले चैत १२ गते बेलुकी बुहारीको कोठाभित्र पसेर हात र मुख च्यापी जबरजस्ती करणी गरेको उजुरी परेपछि प्रहरीले उनको खोजी सुरु गरेको थियो ।

जिल्ला प्रहरी कार्यालयबाट खटिएको टोलीले आरोपित केदारस्युँ गाउँपालिकाको देउरा बजारमा घुमिरहेको बेला पक्राउ गरेको जिल्ला प्रहरी कार्यालय बझाङले जनाएको छ ।

पीडितले अभियुक्तको श्रीमती ९जेठानी० को सहयोगमा प्रहरीमा उजुरी दिएकी हुन् । बलात्कृत महिलाको स्वास्थ्य परीक्षणपछि सुरक्षित महिला आवास गृहमा राखिएको छ । भाइबुहारी बलात्कारको आरोप लागेका जेठाजुलाई जबरजस्ती करणी मुद्दाअन्तर्गत अनुसन्धान गर्न जिल्ला अदालत बझाङले ३ दिनको म्याद थप गरेको र अनुसन्धान भइरहेको डीएसपी विष्टले बताए ।