धनुषामा मोटरसाइकल दुर्घटना हुँदा चार बालकको मृत्यु, एक घाइते

धनुषाको सबैलामा मोटरसाइकल दुर्घटना हुँदा चार बालकको मृत्यु भएको छ ।

दुर्घटनामा एक जना घाइते भएका छन् । मृतक सबै १५ वर्ष मुनीका रहेको प्रहरीले जनाएको छ । उनीहरु एउटै मोटरसाइकलमा सवार रहेको बेला दुर्घटना भएको छ ।

सोमबार राति सबैला नगरपालिका वडा नम्बर १२ बरकुर्वामा ज६प ६७३९ नम्बरको मोटरसाइकल आफैं अनियन्त्रित भई दुर्घटना भएको हो । दुर्घटनामा परि सबैला नगरपालिका २ का १५ वर्षीय राहुल यादव, १२ वर्षीय लक्ष्मी यादव, १४ वर्षीय बौका भनिने विकास यादव र १४ वर्षीय सुमित यादवको मृत्यु भएको इलाका प्रहरी कार्यालय सबैलाका प्रहरी निरीक्षक राजकुमार लुइँटेलले जानकारी दिए ।

उनका अनुसार दुर्घटनामा घाइते सबैलाई उद्धार गरी उपचारका लागि प्रादेशिक अस्पताल जनकपुरधाम पुर्‍याइएको थियो । तर अस्पतालले चार जनालाई मृत घोषणा गरिसकेको छ । घाइते सबैला २ का १९ वर्षीय सुरेन्द्र यादवको उपचार भइरहेको छ ।