काँग्रेस उपसभापतिमा पूर्ण बहादुर खड्काको अग्रता, दोस्रोमा धनराज

नेपाली कांग्रेसको १४औँ महाधिवेशनअन्तर्गत सोमबार भएको मतदानअन्तर्गत उपसभापति पदको मतगणना जारी छ । सानेपास्थित कांग्रेस मुख्यालयमा मतगणना भइरहेको छ । अहिलेसम्मको ३ हजार २ सय ६७ मत गन्दा पूर्ण बहादुर खडकाले १४८४ मतसहित अग्रता लिएका छन । उनलाई १४६१ मत सहित धनराज गुरुङले पछ्याएका छन । यस्तै विजय कुमार गच्छदारको १३५९, चन्द्र भण्डारीको १२३३, सुजता कोईराला ४६२ , महेश आचार्य ३२७ र दिव्यश्वरी शाहले १२२ मत पाएका छन ।

कांग्रेसमा दुई जना उपसभापति निर्वाचित हुनेछन् । कांग्रेसमा दुई जना उपसभापतिका लागि ७ जना प्रतिस्पर्धामा छन् । जसमा सभापति शेरबहादुर देउवाको प्यानलबाट विजयकुमार गच्छदार र पूर्णबहादुर खड्का, शेखर कोइराला प्यानलबाट धनराज गुरुङ र चन्द्र भण्डारी, प्रकाशमान सिंह प्यानलबाट सुजाता कोइराला र विमलेन्द्र निधि प्यानलबाट दिव्येश्वरी शाह उम्मेदवार छन् । त्यस्तै महेश आचार्यले पनि उम्मेदवारी दिएका छन् ।

कांग्रेस केन्द्रीय कार्यसमितिका पदाधिकारी र सदस्य गरी १३२ पदका लागि मतदान भएको थियो । सभापति पदको भने महाधिवेशनस्थल राष्ट्रिय सभागृहमा मतगणना सम्पन्न भई प्रधानमन्त्री एवं पार्टी सभापति शेरबहादुर देउवा पुनःसभापतिमा निर्वाचित भइसकेका छन्।