४२ सय ७६ मा देउवाले फेरि बढाए मतान्तर, ४३१ ले कोइराला पछाडि

नेपाली कांग्रेसको महाधिवेशन अन्तरगत सभापति चयनका लागि भएको निर्वाचनको मतगणना जारी छ  । जारी मतगणनाको पछिल्लो परिणामअनुसार हालसम्म ४२७६ मत गणना गर्दा देउवाले २०४६ पाएका छन् । अर्का उम्मेदवार शेखर कोइरालाले १६१५ मत पाएका छन् । यस्तै अर्को उम्मेदवार प्रकाश सिंहले ३३५ मत प्राप्त गरेका छन भने विमलेन्द्र निधीले २३८ र कल्याण गुरुङले २० मत प्राप्त गरेका छन । मतगणनाको प्राप्त नतिजा समिक्षा गर्दा शुरुवाती चरणमा ५० प्रतिशतले अग्रता गर्ने संकेत देखाएका कोईरालाको मतान्तर कम हुदै गएको छ । यसले पहिलो चरणबाटै सभापतिको टुंगो लाग्ने अनुमानलाई कमजोर बनाएको छ । नेपाली काँग्रेसको बिधानअनुसार सभापतिमा जित हासिल गर्न प्राप्त गर्नुपर्ने ५१ प्रतिशत मतका लागि देउवाले अब ५०५ मतमा ३४५ ल्याउनुपर्छ ।

सोमबार बिहानदेखि रातिसम्म भएको मतदानमा जम्मा चार हजार ७४३ मतदातामध्ये चार हजार ६७९ मतदाताले मतदान गरेका थिए । मतदान सकिएलगत्तै मतपेटिका शिलबन्दी गर्ने, मुचुल्का तयार गर्ने, मतगणना आचारसंहिता तयार गर्नेलगायत आवश्यक प्रक्रिया पूरा गरी मतगणना सुरु गरिएको हो । कांग्रेस विधानअनुसार सभापतिमा निर्वाचित हुन खसेको मतको ५० प्रतिशतभन्दा बढी मत प्राप्त गर्नु अनिवार्य हुनेछ ।

पहिलोपटक कुनै पनि उम्मेदवारले ५० प्रतिशतभन्दा बढी मत नल्याएमा सबैभन्दा बढी मत ल्याउने दुई जनाबीच पुनः मतदान गरिनेछ । पुनः मतदान हुँदा बढी मत प्राप्त गर्ने उम्मेदवार विजयी हुनेछ । तर पहिलोपटक नै दुई जनामात्र उम्मेदवार भएमा बढी मत ल्याउने उम्मेदवार विजयी हुने विधानमा व्यवस्था छ । कांग्रेस केन्द्रीय कार्यसमितिका पदाधिकारी र सदस्य गरी १३२ पदका लागि मतदान भएको थियो । अन्य पदको मतगणना भने सभापति पदको मत गणनापछि पार्टी केन्द्रीय कार्यालयमा गरिने बताइएको छ ।