कर्णालीमा पौडेल पक्षले छान्यो सभापतिका उम्मेदवार

काँग्रेसका वरिष्ठ नेता रामचन्द्र पौडेल प्यानलले कर्णाली प्रदेश सभापतिमा युवा नेता तथा तरुण दलका महामन्त्री भुपेन्द्रजङ्ग शाहीलाई एकल उम्मेदवार बनाएको छ ।

पौडेल पक्षले बृहत छलफलपछि बिहीबार शाहीलाई उम्मेदवार उम्मेदवार बनाएको हो । पौडेल समूहले बिहीबार पत्रकार सम्मेलन गरी शाहीलाई प्रदेश सभापतिमा उठाउने जानकारी दिएको छ ।

कालीकोटका शाही नेपाल विद्यार्थी संघका पूर्वउपाध्यक्ष र तरुण दलका केन्द्रीय महामन्त्री भइसकेका छन् । २०७० सालको संविधानसभा र २०७४ सालको प्रतिनिधि सभा निर्वाचनमा कालीकोटबाट चुनाव लडेका शाही दुवैपटक पराजित भएका थिए ।

पौडेल पक्षले उम्मेदवार घोषणा गरिसक्दा संस्थापन (शेरबहादुर देउवा) पक्षभित्र भने आन्तरिक प्रतिस्पर्धा चलिरहेको छ । संस्थापन पक्षबाट दुई जना सभापतिका आकांक्षी छन् । जाजरकोटका राजिवविक्रम शाह र जुम्लाका ललितजंग शाही सभापतिको उम्मेदवारका लागि लविङमा छन् ।

दुई जनामध्ये टिमभित्रबाट निर्विरोध छनोटका लागि नेताहरूले छलफल जारी राखेको र शुक्रबार बिहानसम्म टुंगो लाग्ने देउवा पक्षले जनाएको छ ।