नेता बास्तोला भन्छन्- माओवादी केन्द्रसँग एकताका लागि कुनै छलफल भएको छैन

नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीले नेकपा माओवादी केन्द्रसँग एकताका लागि कुनै छलफल नै नभएको स्पष्ट पारेको छ ।

शनिबार काठमाडौँमा आयोजित पत्रकार सम्मेलनमा नेकपाका नेता धर्मेन्द्र बास्तोलाले चुनावमा पराजय हुने डरले माओवादी अध्यक्ष प्रचण्डले नेकपासँग एकताको कुरा गरेको हुनसक्ने भन्दै आफ्नो पार्टीभित्र कुनै छलफल नभएको बताएका हुन् । माओवादीको अबको चुनाव बिग्रने र प्रचण्डले पनि एक्लै चुनाव नजित्ने उनले बताए ।

बास्तोलाले वैज्ञानिक समाजवादमा जानका लागि मात्र नेपालमा बृहत् कम्युनिष्ट एकता हुनसक्ने तर्क गरे । त्यस्तै उनले न्यायालयमा देखिएको दृश्यले दुखित तुल्याएको भन्दै न्यायालयमा देखिएको घटना दलाल पूजिवादी व्यवस्थाको उपज भएको जिकिर गरे । उनले आफूहरूले वर्तमान संसदीय व्यवस्था परिवर्तनका लागि जनमत सङ्ग्रहको चुनाव गर्नुपर्ने भन्दै जनमत बिनाको चुनावमा सहभागी हुन नसक्ने बताए ।

त्यस्तै बास्तोलाले जनतालाई मारमा पर्ने गरि पेट्रोलियम पदार्थमा गरिएको मूल्यवृद्धि फिर्ता लिनुपर्ने भन्दै आन्दोलन घोषणा गरिएको बताए । पेट्रोलियम पदार्थमा गरिएको मूल्यवृद्धिले सबै क्षेत्रमा प्रभाव पर्ने भन्दै कुनै पनि हालतमा सरकारले मूल्यवृद्धि फिर्ता लिनुपर्ने उनले बताए । उनले पेट्रोलियम पदार्थमा सरकारले लिएको कर निकै बढी भएको र निगमबाट राज्यमा बस्ने व्यक्तिले फाइदा लिएको आरोप लगाए ।

उनले आफुहरुको अबको आन्दोलन शान्तिपूणरुपमा गर्ने बताएका छन् । नेता बास्तोलाले सरकारले आफूहरूसँग गरेको तीन बुँदे सहमति अझै कार्यान्वयन नभएको गुनासो समेत गरेका छन् ।