दशैंको लागि हवाई टिकट बुकिङ असोज पहिलो सातादेखि खुला गर्ने तयारी

वायुसेवा सञ्चालक संघले असोजको पहिलो सातादेखि अग्रिम टिकट बुकिङ खुला गर्ने तयारी गरेको छ । यसको लागि शुक्रबार बैठक बस्न लागेको संघका प्रवक्ता योगराज कँडेलले जानकारी दिए ।

दशैं, तिहार तथा छठ पर्वका लागि उपत्यका छाड्ने यात्रुका लागि हवाइ सेवातर्फको अग्रिम टिकट बुकिङ असोज पहिलो सातादेखि खुला गर्ने तयारी भएको प्रवक्ता कँडेलले बताए ।

‘वर्षातका कारण स्थल मार्ग (सार्वजनिक यातायात) तर्फ ठाउँ–ठाउँमा सडक अवरोध हुँदा त्यसको प्रत्यक्ष चाप हवाई सेवामा पर्छ,’ प्रवक्ता कँडेलले भने, ‘त्यसैले यसबारे विस्तृत निर्णय शुक्रबारको बैठकले गर्ने छ । बैठकमा जहाज थप्नु पर्ने, बुकिङ कहिलेदेखि खुला गर्ने भन्ने विषयमा निर्णय हुन्छ ।’

उनका अनुसार आन्तरिक उडानतर्फ १३ कम्पनीका ४८ उडानतर्फ दैनिक १५० माथिको नियमित उडान हुँदै आएको छ । दशैं, तिहार र छठमा हवाई यात्रुको चाप उच्च देखिने हुँदा थप जहाज थप्नुपर्ने देखिएको उनले बताए ।