यी हुन् आजका मुख्य समाचार (भिडियोसहित)

नेकपा एमालेका अध्यक्ष केपी शर्मा ओलीले सरकारका गतिविधिको विरोध गर्नेमाथि अङ्कुश लगाउन खोजेको भन्दै आपत्ति जनाएका छन् ।  सोमबार काठमाडौँमा आयोजित युवा सङ्घको भेलालाई सम्बोधन गर्दै अध्यक्ष ओलीले सरकारको विरोध गर्नेलाई कारबाही गर्ने धम्की दिएको भन्दै आपत्ति जनाएका हुन् ।  उनले आफ्नो नेतृत्वको सरकारले वाक स्वतन्त्रतामाथि अङ्कुश लगाएको भनेर विरोध गरे पनि अहिले बोल्न नसकेको तर्क गरे ।  ओलीले दुई महिना पुग्नलाग्दा पनि सरकार बिस्तारले पूर्णता नपाएको भन्दै ओलीले सरकारले कुनै पनि काम नगरेको आरोप लगाए । उनले सरकार जनता केन्द्रीत हुन नसकेको र सुखी नेपाली, समृद्ध नेपालको नारालाई अहिलेको सरकारले अङ्गीकार नगरेको बताएका छन् ।

त्यस्तै उनले अहिलेको सरकार केही दिनको पाहुना मात्रै भएको भन्दै सरकार धेरै दिन नटिक्ने जिकिर गरे । ओलीले गठबन्धन सरकारले दार्चुलामा तुइन चुँडिएको घटनाबारे भारतलाई सोध्न नसकेको आरोप लगाए । नेपाली भूभागमा अनुमतिविना भारतको हेलिकप्टर आए पनि त्यसबारे सरकार बेखबर रहेको उनले बताए ।  सम्बोधनका क्रममा ओलीले एमाले विभाजनको षड्यन्त्रमा सामेल भएको भन्दै सभामुखको निष्पक्ष भूमिका निर्वाह गर्न नसक्ने तर्क गरेका छन् ।

त्यस्तै एमालेका नेता सुवास नेम्वाङले अदालतले जन्माएको सरकारले सांसदलाई बिजनेस दिन नसकेको र सरकारले पनि काम गर्न नसकेको आरोप लगाएका छन् । सरकार गठन भएको ५० दिन कट्दा पनि सरकार विस्तार हुन नसकेको भन्दै नेम्वाङले सरकार विस्तार भएमा सरकार ढल्न सक्ने अवस्था भएको उल्लेख गरे । कार्यक्रममा युवाहरूलाई युवा सङ्घमा प्रवेश गराइएको थियो ।

सरकारले दार्चुला तुइन घटना र नेपाली आकाशमा अनाधिकृत रुपमा हेलिकोप्टर उडाइएकोबारे भारत सरकारलाई छुट्टाछुट्टै कूटनीतिक नोट पठाएको छ । सरकारले दार्चुला घटना भएको झण्डै दुई महिनापछि भारतलाई कूटनीतिक नोट पठाएको हो । परराष्ट्र मन्त्रालयले दिल्लीस्थित नेपाली दूताबासमार्फत दुवै पत्र पठाएको हो ।

साउन १५ मा महाकाली नदी तर्ने क्रममा भारतीय सीमा सुरक्षा बल (एसएसबी)ले तुनइको तार काटिदिँदा दार्चुलाको ब्याँस गाउँपालिका– २ का जयसिंह धामी महाकाली नदीमा बेपत्ता भएका थिए । घटनाबारे छानविन गर्न बनाएको गृह मन्त्रालयले सहसचिव जनार्दन गौतम नेतृत्वको छानविन  समितिले बुझाएको प्रतिवेदनमा पनि एसएसबीको उपस्थितिमा घटना भएको उल्ले गरिएको थियो । साथै घटनाबारे थप अनुसन्धान गरी दोषीलाई कारबाही र पीडित परिवारलाई उचित क्षतिपूर्ति दिन सिफारिस गरेको छ ।

यस्तै भारतले खलंगामाथिको आकाशमा केही दिनदेखि बिनाअनुमति पटकपटक हेलिकप्टर उडाइरहेको थियो। भारतले महाकालीवारि नेपाली सेनाको ब्यारेकमाथिसमेत अनधिकृत रूपमा तारन्तार हेलिकोप्टर उडाउन थालेपछि जिल्ला प्रशासनले भारतसँग लिखित आपत्ति जनाएको थियो ।

संखुवासभामा एकै घरका ६ जनाको हत्या

नेपाली काँग्रेसका नेता गगन थापाले सरकारले एकपछि अर्को गलत निर्णय गरेको आरोप लगाएका छन् । काँग्रेस सिन्धुपाल्चोक क्षेत्र नम्बर दुईले सोमबार काठमाडौँमा आयोजना गरेको एक कार्यक्रममा थापाले जयसिंह धामी देखि सडकमा बोल्न नपाउने जस्ता गलत निर्णय काँग्रेस नेतृत्वको सरकारले गरेको भन्दै झकझकाउने बेला आएको बताएका हुन् ।

उनले प्रतिनिधिसभाको बाँकी अवधिभर सरकारले जनताको ढोका खोल्ने गरी काम गर्नुपर्ने धारणा राखे । थापाले आगामी चुनावमा कसैको काँधमा नचढी बहुमत प्राप्त गर्ने गरी तयारी गर्नुपर्ने बताए । उनले पार्टीको विधि विधान विपरीत काम भएका कारण काँग्रेस कमजोर भएको भन्दै विधि विधान अनुरूप नै पार्टी सञ्चालन गर्न नेतृत्वको ध्यानाकर्षण गराएका छन् ।

कार्यक्रममा काँग्रेसका नेताहरूले वडा, गाउँ–नगर, सङ्घ, प्रदेश लगायत केन्द्रीय महाधिवेशन धाँधलीरहित, निष्पक्ष र पारदर्शीरुपमा सम्पन्न गर्नुपर्ने धारणा राखेका थिए ।

नारायणहिटी दरबार सङ्ग्रहालयमा बेलायती महारानी एलिजाबेथ द्वितीयाले नेपालको पूर्वराजपरिवारलाई उपहार दिएको बग्गी सार्वजनिक गरिएको छ । सोमबार सङ्ग्रहालयमा आयोजित एक कार्यक्रमकाबीच संस्कृति, पर्यटन तथा नागरिक उड्डयन मन्त्रालयका सचिव यादवप्रसाद कोइरालाले बग्गी प्रदर्शनीको उद्घाटन गरेका हुन् । उक्त गोल्डेन बग्गी बेलायतकी महारानी एलिजाबेथले २०३१ सालमा तत्कालीन राजा बिरेन्द्रलाई दिएको सङ्ग्रहालयले जनाएको छ ।

राजाको राज्याभिषेकमा प्रयोग गरिएको उक्त बग्गी नारायणहिटी सङ्ग्रहालयमा राखिँदै आएको थियो । नेपालमा राजतन्त्रको अन्त्यसँगै सङ्ग्रहालयमा बदलिएको नारायणहिटी दरबारमा रहेका यस्ता सामाग्री चरणचरणमा सार्वजनिक गरिँदै आएका छन् ।

कार्यक्रममा सचिव कोइरालाले राजा महाराजाले प्रयोग गरेका बग्गी, सवारीसाधन लगायतका बस्तुलाई क्रमशः प्रदर्शनमा राख्ने बताए । ऐतिहासिक महत्त्वको क्षेत्र नारायणहिटीलाई थप अनुसन्धान खोजका लागि मास्टर प्लान बनाएर नै अघि बढ्ने योजना रहेको उनले बताएका छन् ।

काठमाडौँ महानगरपालिका वडा नं. १ मा रहेको नारायणहिटी दरबार परिसर ७ सय ५४ रोपनी क्षेत्रफलमा फैलिएको छ । परिसर उत्तरतर्फ सेनाको एक पृतना कार्यालय छ । मध्य भागमा महेन्द्र मन्जिल छ । पूर्वतर्फ गणतन्त्र स्मारक र पश्चिमतर्फ परराष्ट्र मन्त्रालयको राहदानी विभाग छ । दरबारभित्र विभिन्न बैठक कोठा, पूर्वराजारानीका शयन कक्ष, राजकीय पाहुनाहरूले प्रयोग गर्ने कक्षसहितका ५२ वटा कोठा छन् । तीमध्ये ३२ वटा कक्ष प्रदर्शनीमा ल्याइएका छन् ।

सेयर धितो कर्जा सीमाको विरोध गर्दै लगानीकर्ताहरूले नेपाल राष्ट्र बैङ्कका गभर्नर महाप्रसाद आधिकारीको राजीनामा माग गर्दै प्रदर्शन गरेका छन् । लगानीकर्ताहरूले गभर्नर अधिकारीको राजीनामा सहित विभिन्न १६ बुँदे माग अघि सार्दै राष्ट्र बैङ्क अगाडी विरोध प्रदर्शन गरेका हुन् । मौद्रिक नीतिको विरोध र लगानीकर्ताको हकहितका लागि प्रदर्शन गर्न बाध्य भएको लगानीकर्ताको भनाई छ । केन्द्रीय बैङ्कको अस्तित्व नै धरापमा पार्ने गरी नियोजित रूपमा तयार गरिएका नीति, कार्यक्रम र कार्यनीतिहरूले समग्र पुँजी बजारमा समस्या पारेपछि गर्भनरको राजीनामा मागिएको लगानीकर्ताको आरोप छ ।

प्रदर्शनकारीले १० कित्ता नीति हटाउन पाइदैन, पूजिँबजारप्रति स्थायी नीति कायम गर, गर्भनरलाई बर्खास्त गर लगाएका प्लेकार्ड प्रदर्शन गरेका थिए । राष्ट्र बैङ्कबाट पुँजी बजारको अस्तित्व नै धरापमा पार्ने गरी विभिन्न समयमा नियोजित तयार गरिएका नीति कार्यक्रम र कार्य नीतिहरूले समग्र पुंजीबजार अगाडी बढ्न नसकेको लगानीकर्ताले जनाएका छन् । प्रदर्शनपछि पुँजी बजार सुधार सङ्घर्ष समितिले नेपाल राष्ट्र बैङ्कलाई ज्ञापन पत्र पनि बुझाएको छ ।  गभर्नरले राजीनामा दिनु पर्ने, केन्द्रीय बैङ्कले मौद्रिक नीतिमार्फत ल्याएको मार्जिन कर्जामा १२ करोडको सीमा हट्नुपर्ने, लघुवित्त कम्पनीहरूले वितरण गर्ने लाभांशमा लगाइएको क्याप हटाउनुपर्ने, प्रोभिजनिङ्कको व्यवस्था परिमार्जन गर्नुपर्ने लगायतका माग सहितको ज्ञापन पत्र बुझाएको समितिले जनाएको छ ।

नेपालमा सोमबार थप १ हजार ८ सय ९७ जनामा कोरोना संक्रमण पुष्टि भएको छ । देशभर गरिएको ११ हजार ६ सय ९ पिसिआर परीक्षणका क्रममा १ हजार ४ सय ८८ र ४ हजार ३ सय ७० एन्टीजेन परीक्षणका क्रममा ४०९ जनामा कोरोना जनामा कोरोना पुष्टि भएको स्वास्थ्य मन्त्रालयले जनाएको छ । यो सँगै कोरोना सङ्क्रमितको सङ्ख्या ८ लाख ५६ हजार २ सय १८ पुगेको छ ।

त्यस्तै कोरोनाका कारण थप २० जनाको मृत्यु भएको छ । हालसम्म कोरोनाका कारण १० हजार ८ सय ५८ जनाले ज्यान गुमाएका छन् । त्यस्तै थप १ हजार ७ सय ४३ सङ्क्रमित कोरोनामुक्त हुँदा हालसम्म ७ लाख २८ हजार ९ सय २८ सङ्क्रमित निको भएका छन् ।

हाल नेपालमा ३० हजार ९ सय ७३ सङ्क्रमित आइसोलेसन र २ सय ६० सङ्क्रमित क्वारेन्टाइनमा छन् । त्यस्तै अहिलेसम्म ३९ लाख ६९ हजार ७ सय २१ पिसिआर र ४ लाख ९२ हजार १ सय १४ वटा एन्टीजेन परिक्षण गरिएको मन्त्रालयले जनाएको छ ।

नेपालसँगको मैत्रीपूर्ण खेलका लागि बङ्गलादेशको राष्ट्रिय महिला फुटबल टिम सोमबार नेपाल आईपुगको छ । बंगलादेशी टोलीलाई त्रिभुवन अन्तर्राष्ट्रिय विमानस्थलमा अखिल नेपाल फुटबल सङ्घ (एन्फा) का उपाध्यक्ष शिक्षित पराजुली, एन्फा महिला कमिटीका पदाधिकारी लगायतले स्वागत गरेका थिए । बङ्गलादेशले नेपालसँग दुई मैत्रीपूर्ण खेल खेल्नेछ । नेपाल र बङ्गलादेशबिचको खेल सेप्टेम्बर ९ र १२ तारिकमा दशरथ रङ्गशालामा हुनेछ । उज्बेकिस्तानमा आयोजना हुने एएफसी महिला एसियन कप–२०२२ छनोट अघि नेपालले बङ्गलादेशसँग मैत्रीपूर्ण खेल खेल्न लागेको हो ।

छनोटका लागि मुख्य प्रशिक्षक ग्यालरी फिलिप्सले २३ सदस्यीय नेपाली टिमको घोषणा गरिसकेको छ । छनोटमा नेपाल समूह ’एफ’ मा रहेको छ । नेपालको समूहमा फिलिपिन्स र हङकङ रहेको छ । छनोट खेल उज्बेकिस्तानको जेएआर स्टेडियममा हुनेछ । नेपालले फिलिपिन्ससँग खेल्दै छनोटको सुरुवात गर्नेछ । नेपाल र फिलिपिन्सबिचको खेल सेप्टेम्बर १८ मा हुनेछ । समूहको शीर्ष टोलीले अर्को वर्ष भारतमा हुने एसियन कप खेल्नेछ । एसियन कप जनवरी २० देखि फेब्रुअरी ६ सम्म हुनेछ ।

गिनीको विशेष सैन्य बलले ‘कु’ गर्दै सत्ता आफ्नो हातमा लिएको छ । सेनाले राष्ट्रपति अल्फा कोन्डेलाई पक्राउ गर्दै मुलुकको राजनीतिक अवस्थामा सुधार गर्ने दाबी गरेको छ । पश्चिमी अफ्रिकामा रहेको गिनीमा ‘कु’ गरेसँगै सेनाले सरकारका सबै मन्त्रीलाई छलफलका लागि बोलाउने बताएको छ । अब अनिश्चितकालका लागि कर्फ्यु घोषणा गरिएको छ ।

 गिनीको सेनाले आफूले बोलाएको बैठकमा नआउने सबैलाई विद्रोहीको रूपमा हेर्ने चेतावनीसमेत दिएको छ । यसअघि आइतबार राष्ट्रपति कोन्डेप्रति बफादार रहेका सैनिक र विशेष सैन्यबलबीच दोहोरो फयरिङ्ग चलेको थियो । राजधानी सहर कोनाक्रिमा चलेको यो फयरिङ्गपछि गिनीको विशेष सैन्य बलले राष्ट्रपतिलाई पक्राउ गरेको छ । एक करोड ३० लाख जनसंख्या रहेको गिनी खानी तथा स्रोतको हिसाबमा सम्पन्न भए पनि विश्वको सबैभन्दा गरिब मुलुकमध्येको एक हो । लामो समयदेखि यो मुलुक राजनीतिक अस्थिरतामा फस्दै आएको छ ।