गभर्नरको राजीनामा माग गर्दै राष्ट्र बैंक अगाडी विरोध प्रदर्शन

सेयर धितो कर्जा सीमाको विरोध गर्दै लगानीकर्ताहरूले नेपाल राष्ट्र बैंकका गभर्नर महाप्रसाद आधिकारीको राजीनामा माग गर्दै प्रदर्शन गरेका छन् । लगानीकर्ताहरूले गभर्नर अधिकारीको राजीनामा सहित विभिन्न १६ बुँदे माग अघि सार्दै राष्ट्र बैंक अगाडी विरोध प्रदर्शन गरेका हुन् ।

मौद्रिक नीतिको विरोध र लगानीकर्ताको हकहितका लागि प्रदर्शन गर्न बाध्य भएको लगानीकर्ताको भनाई छ । केन्द्रीय बैंकको अस्तित्व नै धरापमा पार्ने गरी नियोजित रूपमा तयार गरिएका नीति, कार्यक्रम र कार्यनीतिहरूले समग्र पुँजी बजारमा समस्या पारेपछि गभर्नरको राजीनामा मागिएको लगानीकर्ताको आरोप छ ।

प्रदर्शनकारीले १० कित्ता नीति हटाउन पाइँदैन, पुँजीबजारप्रति स्थायी नीति कायम गर, गभर्नरलाई बर्खास्त गर लगाएका प्लेकार्ड प्रदर्शन गरेका थिए । राष्ट्र बैंकबाट पुँजी बजारको अस्तित्व नै धरापमा पार्ने गरि विभिन्न समयमा नियोजित तयार गरिएका नीति कार्यक्रम र कार्य नीतिहरूले समग्र पुँजीबजार अगाडी बढ्न नसकेको लगानीकर्ताले जनाएका छन् ।

प्रदर्शनपछि पुँजी बजार सुधार सङ्घर्ष समितिले नेपाल राष्ट्र बैंकलाई ज्ञापन पत्र पनि बुझाएको छ । गभर्नरले राजीनामा दिनु पर्ने, केन्द्रीय बैंकले मौद्रिक नीतिमार्फत ल्याएको मार्जिन कर्जामा १२ करोडको सीमा हट्नुपर्ने, लघुवित्त कम्पनीहरूले वितरण गर्ने लाभांशमा लगाइएको क्याप हटाउनुपर्ने, प्रोभिजनिङ्कको व्यवस्था परिमार्जन गर्नुपर्ने लगायतका माग सहितको ज्ञापन पत्र बुझाएको समितिले जनाएको छ ।