यी हुन् आजका मुख्य समाचार (भिडियोसहित)

अविरल वर्षाका कारण बुटवलको ज्योति नगर क्षेत्र माथिबाट पहिरो खस्दा सिङ्गो बस्ती नै जोखिममा परेको छ । चुरे पहाड तल रहेको ज्योति नगर क्षेत्र माथिबाट पहिरो खस्दा दर्जन बढी घरमा क्षति पुगेको छ ।  पहिरोले तीन वटा घर पुरेको छ भने अन्य घरहरूमा पनि बस्न नहुने गरी क्षति पुर्‍याएको प्रहरीले जनाएको छ । गत शुक्रबार नै बस्ती माथिको वन क्षेत्रमा पहिरो गएपछि सतर्क अवस्थामा रहेकाले मानवीय क्षति भने हुन नपाएको बताइएको छ ।

स्थानीयवासीले पहिरोले क्षति पुर्‍याएका घरबाट सामान निकालेका छन् भने अन्य घरका बासिन्दाहरू पनि घर छाडेर अन्यत्र गइरहेका छन् । पहिरोपछि आफूहरूलाई खाने र बस्ने समस्या भएको स्थानीयहरूले गुनासो गरेका छन् ।

यसअघि २०५५ सालमा गएको पहिरोले ज्योति नगर क्षेत्रमा ठूलो विपत्ति ल्याएको थियो ।

नेकपा (एमाले) का सांसद सोमप्रसाद पाण्डेले एमालेका मध्यमार्गी तथा दोस्रो तहका नेताहरूकै कारण माधव नेपालले पार्टी विभाजन गरेको बताएका छन् ।  रिपोटर्स क्लबले आइतबार काठमाडौँमा गरेको साक्षात्कारमा उहाँले माधव नेपालले मात्र नभई स्थायी कमिटीका सबै जनाले धकेल्दै धकेल्दै विभाजनमा पुराएको बताएका हुन् । माधव नेपाललाई पार्टी विभाजनको अवस्थामा पु¥याउने काम नै भीम रावल, घनश्याम भुसाल, योगेश भट्टराईहरूले गरेको उनको आरोप थियो । आफू पार्टी एकताको क्रममा सबै विषयमा चासो राख्ने नेता भएको उल्लेख गर्दै माधव नेपाल विभाजनमा जाँदा दुःख लागेको पनि उनले बताए । आफूले पनि निर्वाचन आयोगमा एकीकृत समाजवादीमा रहनेगरि सनाखत गर्न गएको र अहिलेसम्म आयोगले निर्णय नदिएको पनि उनले बताएका छन् ।

साक्षात्कारमा काँग्रेसका प्रभावशाली नेता तथा पूर्वमन्त्री मीन विश्वकर्माले राजनीति दल विभाजनसम्बन्धी अध्यादेश ल्याउनु गलत नभएको बताए । अहिले शेरबहादुर देउवाले संसद् पूनःस्थापना गरेर संसद्को अधिवेशन अन्त्य भएको बेलामा ल्याएको उनको भनाई छ । एमाले नेताहरूले काँग्रेसले आफ्नो पार्टी फुटाइदिएको भनेर लगाएको आरोपमा पनि कुनै सत्यता नभएको विश्वकर्माको टिप्पणी थियो । त्यस्तै, राष्ट्रिय जनमोर्चाका सचिव हिमलाल पुरीले आफ्नो पार्टी तत्काल सरकारमा नजाने स्पष्ट पारेका छन् ।

दक्षिण अफ्रिकाबाट नेपाल हुँदै भारतमा कोकिन सप्लाइ गर्ने समूहलाई नेपाल प्रहरीले पक्राउ गरेको छ ।  तीन मुलुकका तीन जना नागरिकलाई झन्डै ३ किलोग्राम कोकिन सहित नेपाल प्रहरीको लागु औषध नियन्त्रण ब्युरोले पक्राउ गरेको हो । पक्राउ पर्नेमा एक जना दक्षिण अफ्रिकी, एकजना तान्जेनियाका र एक जना भारतीय नागरिक रहेको ब्युरोले जनाएको छ । उनीहरूबाट जफत भएको लागू औषधको मूल्य करिब ९ करोड रुपैयाँ पर्ने प्रहरीले जनाएको छ , दक्षिण अफ्रिकी नागरिक सार्ली गामा भदौ ३ गते कतार एयरबाट केपटाउन, दोहा हुँदै काठमाडौँ आएका थिए ।

उनले उतैबाट लागू औषध ल्याएको प्रहरीलाई बयान दिएका छन् । त्यस्तै उनले ल्याएको कोकिनको नेपालमा तान्जेनियन नागरिक किमारोले व्यवस्थापन गरेर भारत लैजाने तयारी गरेका थिए । दुई बाहेक भारतीय नागरिक विजय सिंह पनि आपराधिक गतिविधिमा जोडिएको प्रहरीले जनाएको छ । सार्लीलाई काठमाडौंको कमलादीमा रहेको एक होटेलबाट पक्राउ गरेको र किमरो भने भारत फरार हुने क्रममा सिन्धुलीबाट पक्राउ गरेको प्रहरीले जनाएको छ । उनीहरूमाथि थप अनुसन्धान भइरहेको प्रहरीले जनाएको छ ।

यमनको सबैभन्दा ठूलो सैन्य हवाई अड्डामा आइतबार भएको हमलामा परी कम्तीमा ३० जना सरकार समर्थक लडाकूकोे मृत्यु भएको छ ।  घटनामा दर्जनौँ अन्य घाइते भएका छन् । उक्त हमलाका लागि इरानको निकट मानिने यमनी हुथी विद्रोहीलाई दोषी ठह-याएको चिकित्सक तथा सरकार निकट उक्त लडाकु समूहले जानकारी गराएको छ ।

सैनिक चिकित्सकले घटना लगत्तै दिएको प्रतिक्रियामा सात जनाको मृत्यु भएको बताएपनि अस्पतालमा पुगेका अन्य २३ जनाको पनि उपचारका क्रममा मृत्यु भएको बताएका छन् । घाइतेमध्ये अझै केहीको स्वास्थ्य अवस्था गम्भीर रहेकोले मृतक सङ्ख्या अझै बढ्नसक्ने बताइएको छ  । हुथी समूहले यस घटनाबारे कुनै प्रतिक्रिया जनाइसकेको छैन ।