ज्ञापनपत्र बोकेर पूर्वआईजीपीहरु बालुवाटारमा, प्रहरी एकडेमी सार्ने निर्णय उल्ट्याउन माग

नेपाल प्रहरीका पूर्वप्रहरी महानिरीक्षकहरू (आइजिपी) ले बुधबार प्रधानमन्त्री शेरबहादुर देउवालाई भेटेर ज्ञापनपत्र बुझाएका छन् । महाराजगञ्जस्थित राष्ट्रिय प्रहरी प्रशिक्षण प्रतिष्ठान (प्रहरी एकडेमी) लाई काभ्रेमा सार्ने निर्णय खारेज गर्न माग गर्दै १५ पूर्व आईजीपीहरुले प्रधानमन्त्री देउवालाई ज्ञापन पत्र बुझाएका हुन् ।

प्रधानमन्त्री देउवालाई बुझाएको ज्ञापन पत्रमा ऐतिहासिक पहिचान बोकेको तथा प्रहरीको व्यवसायीकताको उद्गम थलोको रुपमा स्थापित राष्ट्रिय प्रहरी प्रशिक्षण प्रतिष्ठानको इतिहास नामेट पार्ने कार्य रोकिनुपर्ने उल्लेख छ ।

राष्ट्रपति कार्यालयलाई विस्तार गर्नका लागि भन्दै तत्कालीन प्रधानमन्त्री केपी शर्मा ओलीको मन्त्रिपरिषद् बैठकले प्रतिष्ठानलाई त्यहाँबाट हटाउने निर्णय गरेको थियो । तर नेपाल प्रहरीका पूर्वआइजिपीहरूले विरोध गर्दै आएका छन् । त्यही निर्णयलाई खारेज गरिदिन भन्दै प्रधानमन्त्री देउवालाई भेट्न पूर्वआइजिपीहरू गएका हुन्।

ओली सरकारले प्रहरी प्रशिक्षण प्रतिष्ठानको जग्गाको स्वामित्व राष्ट्रपति कार्यालयलाई हस्तान्तरण गर्ने गरी भएका कामकारबाहीबाट नेपाल प्रहरीको संस्थागत विकासको महत्वपूर्ण आधारशिला एवम् जीवत संग्रहालयको अस्तित्व मासिने चिन्ता पूर्व प्रहरी प्रमुखहरुको छ ।

नेपाल प्रहरी पूर्व संगठन प्रमुख मञ्चको तर्फबाट पूर्व प्रहरी महानिरीक्षकहरु दुर्लभ कुमार थापा, मोतीलाल बोहोरा, अच्युत कृण्ण खरेल, ध्रुब बहादुर प्रधान, प्रदीप शमशेर राणा, श्याम भक्त थापा, ओम विक्रम राणा, हेम बहादुर गुरुङ, रमेश चन्द ठकुरी, रवीन्द्र प्रताप शाह, कुबेर सिंह राना, उपेन्द्रकान्त अर्याल, प्रकाश अर्याल, सर्वेन्द्र खनाल र ठाकुर प्रसाद ज्ञवालीले ज्ञापनपत्र बुझाएका हुन् । उनीहरुले पूर्ववर्ती सरकारको निर्णय यथाशीघ्र खारेजीको माग गरेका हुन् ।

पूर्वआईजीपी मोतिलाल बोहोराले ओली सरकारले गरेको निर्णय अदूरदर्शी, अव्यवहारिक र पूर्णतः अवैज्ञानिक रहेको बताए । ‘प्रहरीका पूर्खाको रगत पसिनाले आर्जेको भौतिक सम्पत्ति राष्ट्रपति कार्याल्यको सुविधा बढाउन लागि सरकारले गरेको निर्णयले वहालवाला तथा लाखौं पूर्वप्रहरी कर्मचारीको भावनामा कुठाराघात गरेको छ’ उनले भने ।

फेसबुकबाट प्रतिक्रिया
सम्बन्धित समाचार