सुदूरपश्चिम प्रदेश सभाको अधिवेशन आह्वान, मुख्यमन्त्री शाहले विश्वासको मत लिने

सुदूरपश्चिम प्रदेश सभाको पाँचौं अधिवेशन आह्वान भएको छ ।

शुक्रबार मन्त्रिपरिषद् बैठकले गरेको सिफारिसका आधारमा प्रदेश प्रमुख नजिर मियाँले प्रदेश सभाको पाँचौ अधिवेशन आह्वान गरेका हुन् ।

मियाँले पाँचौँ अधिवेशनको पहिलो बैठक आइतबार दिउँसो २ बजे बस्नेगरी बोलाउन सभामुख भीमबहादुर भण्डारीलाई पत्राचार गरेको प्रदेश प्रमुखको कार्यालयले जनाएको छ ।

प्रदेश सभाको पाँचौं अधिवेशनमा मुख्यमन्त्री कमलबहादुर शाहले विश्वासको मत लिएर चालु आर्थिक वर्षका लागि बजेट ल्याउने तयारी गरेका छन् ।

नेकपा एमालेको समर्थनमा गत साता मुख्यमन्त्री नियुक्त भएका उनले सुरुमा नै विश्वासको मत लिएर काम कारबाही अघि बढाउने तयारी गरेका हुन् । कांग्रेस प्रदेश संसदीय दलका नेतासमेत रहेका शाहलाई नेकपा एमाले र नागरिक उन्मुक्ति पार्टीको समर्थन छ । ५३ सदस्यीय प्रदेश सभामा तीन दलको सुविधाजनक बहुमत रहेको छ ।