अन्नपूर्ण एयरको हेलिकप्टर बाँकेमा आकस्मिक अवतरण

काठमाडौँबाट बैतडीका लागि उडेको अन्नपूर्ण एयरको नाइन एन-एनयु हेलिकप्टर आकस्मिक अवतरण गरिएको छ । मौसम खराब भएको कारण बाँकेको राप्तीसोनारी गाउँपालिका १ भम्कामा खेतमा अपराह्न ४ बजेर ४० मिनेटमा आकस्मिक अवतरण गरिएको हो ।

सशस्त्र प्रहरी बल ३० नम्बर बागेश्वरी गण हेडक्वाटरका एसपी विमल डाँगीका अनुसार सो हेलिकोप्टर नेपालगन्जमा तेल भरेर बैतडी जाने तय भएको थियो । तर मौसम खराब भएकोले नेपालगन्ज नपुग्दै बाँकेको खेतमै आकस्मिक अवतरण गरिएको हो ।

उनका अनुसार हेलिकप्टरमा सवार भारतीय नागरिक र पाइलटसहित हेलिकप्टर पनि सुरक्षित रहेको जनाउँदै त्यहाँबाट हेलिकप्टरलाई राप्तीसोनारीकै कुसुमस्थित सशस्त्र प्रहरीको बेस क्याम्पमा राखिएको बताए ।