यी हुन् हेलिकप्टर दुर्घटनामा ज्यान गुमाउने पाँच जना

बुधबार दिउँसो एयर डाइनेस्टीको हेलिकप्टरका क्याप्टेनसहित ५ जनाको मृत्यु भएको छ ।

नुवाकोटको प्रमुख जिल्ला अधिकारी रामकृष्ण अधिकारीले दुर्घटनामा ज्यान गुमाएका चार चिनियाँ एकै परिवारको भएको हुन सक्ने आशंका गरिएको जनाए ।

मृत्यु हुनेमा क्याप्टेन अरुण मल्ल र चिनियाँ नागरिकहरू जुताड ताङ, ताइ ली, जेमिङ जी र यीयाड वु रहेका छन् । मृत्यु भएका चिनियाँ नागरिकमा ३ पुरुष र १ महिला छन् ।

बुधबार १ बजेर ५४ मिनेटमा त्रिभुवन विमानस्थलबाट चार चिनियाँ यात्रु लिएर उडेको उक्त हेलिकप्टर शिवपुरी गाउँपालिका-७ सूर्यचौर डाँडामा दुर्घटना हुँदा हेलिकप्टरमा सवार पाँचै जनाको ज्यान गएको हो ।

प्रत्यक्षदर्शीका अनुसार हेलिकप्टर रुखमा ठोक्किएर आगो लाग्दै झरेको थियो ।