पहिरोले घर पुरिँदा हजुरआमाको मृत्यु, नातिनीको खोजी हुँदै

रोल्पामा पहिरोले घर पुरिँदा हजुरआमाको मृत्यु भएको छ भने नातिनी बेपत्ता भएकी छन् । शुक्रबार राति सुनछहरी गाउँपालिका(४ कामी डाँडामा पहिरो जाँदा देउसिंह कामीको घर पहिरोले पुरिएको हो ।

जिल्ला प्रहरी कार्यालय रोल्पाका अनुसार राति ९ बजेतिर घर माथिबाट पहिरो आएर घर पुरिएको हो । घरमा हजुरआमा र नातिनी रहेका थिए । पहिरोमा पुरिएकी ६५ वर्षीया हजुरआमा बसुना सुनार भने घरभित्रै मृत अवस्थामा फेला परेकी छन् भने चार वर्षीया नातिनी किमा सुनार बेपत्ता रहेकी छन् । वर्षा नरोकिएको र पहिरो झर्ने क्रम जारी रहेको रहेकाले उद्धारमा समस्या भएको प्रहरीले बताएको छ ।

शुक्रबार देउसिंह र उनकी श्रीमती भने घरमा थिएनन् । उनीहरू कामको शिलशिलामा बाहिर रहेका कारण जोगिएको प्रहरीले जनाएको छ ।