कोशी प्रदेश सरकारविरुद्धको रिट उपर आज मुख्यमन्त्री पक्षका वकिलहरूले बहस गर्ने

कोसी प्रदेशका मुख्यमन्त्री उद्धव थापाले लिएको विश्वासको मत असंवैधानिक रहेको दाबी गरी सर्वोच्च अदालतमा हालिएको मुद्दाको सुनुवाइ आज पनि पूर्ण इजलासमा जारी रहनेछ ।

सर्वोच्च अदालतको पूर्ण इजलासमा सोमबारबाट सुरु भएको सुनुवाइ हिजो हेर्दाहेर्दैमा सकिएको छ । सोमबार रिट निवेदक नेकपा एमाले संसदीय दल कोशी प्रदेशका नेता हिक्मतकुमार कार्कीको पक्षबाट बहस सकिएको छ ।

न्यायाधीशहरू सपना प्रधान मल्ल, डा. कुमार चुँडाल र नहकुल सुवेदीसहितको पूर्ण इजलासमा सोमबार सुरु सुनुवाइ नसकिएकाले मुद्दा हेर्दाहेर्दैमा राखेर बहसलाई आज पनि निरन्तरता दिइने भएको हो ।

आइतबार सर्वोच्च अदालतका न्यायाधीशद्वय सपना प्रधान मल्ल र सुष्मालता माथेमाको संयुक्त इजलासले कोशी सरकारविरुद्धको रिट निवेदनलाई पूर्ण इजलासमा पठाउने आदेश दिएको थियो ।

विपक्षीका तर्फबाट बहस गर्न २० जना कानुन व्यवसायीहरुको सूची रहेको छ । कोशी प्रदेशका मुख्यन्यायाधीवक्ता बुद्धिबहादुर कट्टुवालका अनुसार समय सीमा छुट्याएर बहसको समय तोकिएको बताए ।