विराटनगर – आन्दोलनकारी र प्रहरीबीच झडप हुँदा १८ जना घाइते भएका छन्।विराटनगरको बिग होटलमा दिगो विकास लक्ष्य प्राप्तिका लागि स्रोत व्यवस्थापनसम्बन्धी अन्तर क्रियात्मक कार्यशालामा सहभागी हुन आउने सांसदहरूलाई दबाब दिन पुगेका पहिचान पक्षधर आन्दोलनकारी र प्रहरीबीच झडप हुँदा १८ जना घाइते भएका हुन्।
आन्दोलनकारीले प्रहरीको घेरा तोड्न खोजेपछि झडप हुँदा नेपाल प्रहरकिा ६ जना घाइते भएको मोरङ प्रहरीका प्रवक्ता डिएसपी रन्जनकुमार दाहालले जानकारी दिए। सशस्त्रको ४ जना घाइते भएको सशस्त्र प्रहरी बलले जनाएको छ।
यता, आन्दलोनकारी तर्फ ९ जना घाइते भएका छन्। घाइते हुनेहरूमा धरान- ८ का अशोक राई, तरहराका सरोज लिम्बू, धरान- ११ का ज्ञानबहादुर राई, धरान-१६ का शिव आङ्देम्बेक, इलाम माङसेबुङका उदय लिम्बूको, मोरङ ग्रामथानका सुरज राई, धरान- ६ र अर्का धरानका एन के दर्नाल , विशाल राई र ईटहरीका पदमलाल लिम्बू घाइते भएका छन्। घाइतेहरूको कसैको खुट्टमा त कसैको टाउकोमा चोट लागेको छ।
झडपका कारण केही समय विराटनगर तनावग्रस्त बनेको थियो। प्रहरीले आन्दोलनकारी माथि पानीको फोहराका साथै अश्रुग्यास प्रहार गरेको थियो भने आन्दोलनकारीले प्रहरीमाथि ढुंगामुढा गरेका थिए।