सत्ता साझेदारीका विषयमा जसपाभित्र विवाद (भिडयो)

सत्ता साझेदारीका विषयमा प्रधानमन्त्री केपी ओलीसँग भएको छलफलका विषयमा जनता समाजवादी पार्टी (जसपा) भित्र तिव्र विवाद भएको छ ।

जसपाका केहि नेता ओलीसँगको वार्ताका विषयमा असन्तुष्ट देखिएको छ भने अर्को पक्षले आफ्ना मागका बारेमा मात्र प्रधानमन्त्रीसँग वार्ता गरेको दाबी गरेको छ । मंगलबार बालुवाटारमा जसपा नेता र सरकारी कार्यदलबीच छलफल भएको थियो ।

जसपा अध्यक्ष उपेन्द्र यादवले भने पार्टीका तर्फबाट ओलीसँग कुनै छलफल नभएको बताए । प्रधानमन्त्रीसँगको भेटघाट व्यक्तिगत हुन सक्ने तर पार्टीको औपचारिक छलफल नभएको उनले तर्क गरेका छन् ।

अन्य दलसँग छलफल गर्नका लागि डा बाबुराम भट्टराई, आफु स्वयं, महन्थ ठाकुर, राजेन्द्र महत्तो र आशोक राई सम्मिलित टिम नै पार्टीको आधिकारीक टिम रहेको भन्दै यादवले आफुहरुले प्रधानमन्त्रीसँग कुनै छलफल नगरेको बताए । उनले कोहिले पनि व्यक्तिगत रुपमा कसैसँग भेट गर्न सक्ने र यसलाई पार्टीभित्रको मतभेद भन्न नमिल्ने जिकिर गरे ।

यता जसपा नेता राजेन्द्र महतोले भने प्रधानमन्त्रीसँगको छलफलका बारेमा अध्यक्ष र पार्टीलाई जानकारी गराउन नै बाँकी रहेको बताए । उनले छलफलका लागि जन्ती र जुलुस लिएर जान नमिल्ने भन्दै बालुवाटारबाट खबर आएकाले छलफल गर्न गएको उल्लेख गरे । छलफलमा जे निष्कर्ष आएपनि पार्टीभित्र छलफल गरिने उनको भनाइ छ । प्रधानमन्त्रीसँगको छलफलका क्रममा आफूहरुको मागका बारेमा छलफल भइरहेको र राम्रो गृहकार्य भइरहेको पाइएको उनले बताए ।

जसपाको एक पक्ष ओली इतर समूहसँग सहकार्य गर्नुपर्ने पक्षमा छ भने अर्को पक्ष वर्तमान प्रधानमन्त्री एवं नेकपा अध्यक्ष केपी ओलीलाई नै समर्थन गर्ने पक्षमा छ ।