आफ्नो घर आफै भत्काउनेलाई सम्मान

धनगढीमा मोहनापुल–अत्तरिया सडकको सीमाभित्र रहेका आफ्ना घर आफै भत्काएका घरधनीलाई फुलमालासहित दोसल्ला ओढाएर सम्मान गरिएको छ ।

युवा दबाव समूहले सोमबार ६ लेन सडकमा परेका संरचना स्वस्फुर्त रुपमा भत्काउने घरधनीका लागि सम्मान कार्यक्रम राखेको थियो । उक्त कार्यक्रममा स्वस्फुर्त रुपमा घर भत्काएर सडकको निर्माणमा सहजीकरण गरेका १९ जनालाई अविर लगाउँदै दोसल्ला ओढाएर सम्मानित गरिएको छ ।

धनगढी चौराहामा आयोजना गरिएको कार्यक्रममा विवेकशील साझा पार्टीका प्रदेश नम्बर ७ का संयोजक गोपाल हमालले मीनकाजी श्रेष्ठको जस्तै अरु रिट निवेदनकर्तालाई पनि विकासका लागि ठूलो हृदय देखाउन आग्रह गरे ।

यस्तै युवा दबाब समूहले रिट निवेदन दिएर क्षतीपुर्ती माग गरेका घर धनीहरुका लागि भन्दै सांकेतिक रुपमा एक रुपैया संकलन गरेको छ । ट्राफिक चोकमा बाकस राखेर नै एक रुपैयाँ अभियान सुरु गरिएको हो । अभियानका संयोजक तथा दृष्टिबिहीन युवा अर्जुन रावलले आफुहरुले सांकेतिक रुपमा यस्तो अभियान सुरु गरेको बताए ।

धनगढीका धना जोशी, लोकवहादुर कुँवर, गंगा शाह, यज्ञराज ओझा, मानवहादुर चन्द, ज्ञानवहादुर विष्ट, कुसुमलता गैरे, महेन्द्रनाथ गैरे, मानवहादुर खड्का, दुर्गा खड्का, सुरज विक्रम श्रेष्ठ र सरफ सिंह वोहोरा गरी १३ जना घरधनीहरुले सर्वोच्चमा रिट हालेका छन् ।

यता मोहनापुल–अत्तरिया सडकको संरचना भत्काउने कार्य रोक्न भन्दै सर्वोच्चमा रिट निबेदन दिएका १३ जना मध्येका एकजना मीनकाजी श्रेष्ठले आफ्नो मुद्दा फिर्ता लिने घोषणा गरेका छन् ।

६ लेन सडकको निर्माणमा अवरोध नगर्न भन्दै दबाब दिनका लागि गठन भएको युवा दबाब समूहको कार्यक्रममा उपस्थित भएर श्रेष्ठले आफु विकासको विरोधी हुन नचाहेकाले मुद्दा फिर्ता लिएको बताए । उनको श्रेष्ठ गेष्ट हाउस भएको घर पनि सडकको सीमामा परेको थियो ।

Related posts

Leave a Comment